ශ්රී ලංකාවේ උත්සන්න වන ආහාර අර්බුදය හමුවේ ලෝක ආහාර වැඩසටහන (WFO) හදිසි මානුෂීය ආධාර වැඩසටහනක් ක්රියාත්මක කර තිබෙනවා.
ඒ අනුව කොළඹ දිස්ත්රික්කයේ ගැබිණි මවුවරුන් වෙත ආහාර වවුචර්පත් ලබා දුන්නා.
ශ්රී ලංකාවේ ආර්ථික අර්බුදය හේතුවෙන් ආහාර සපයා ගැනීමට නොහැකි දැඩි අවදානමකට ලක්ව සිටින ශ්රී ලාංකිකයන් ලක්ෂ 30 කට පමණ ආහාර වවුචර්පත්, ආහාර හෝ මුදල් ලබා දීමට සැලසුම් කරමින් සිටින බව පවසන ලෝක ආහාර වැඩසටහන ජූනි සිට දෙසැම්බර් දක්වා ලක්ෂ 30ක ජනතාවකට ආධාර ලබා දීම සඳහා ඇමෙරිකා එක්සත් ජනපද ඩොලර් මිලියන 60 ක මුදලක් අවශ්ය බවයි කියන්නේ.
ලෝක ආහාර වැඩසටහන මගින් ලබාදෙන මාසික වවුචර්පත රුපියල් 15000 ක, වටිනාකමින් යුක්ත වන අතර එය ගැබිණි මවුවරුන් 2000 කට වැඩි ප්රමාණයකට අවශ්ය ආහාර ලබාගැනීමට ප්රයෝජනවත් වනු ඇතැයි පැවැසෙයි.
අත්යාවශ්ය භාණ්ඩ වල හිඟය හේතුවෙන් පහල ආදායම් ලබන පවුල් ආහාර ලබාගැනීමට නොහැකිව අසීරුතාවයට පත්ව ඇති බවත් ශ්රී ලංකාවේ ජනගහණයෙන් 22% කට ආහාර සුරක්ෂිතතාවයක් නොමැති වීම හේතුවෙන් සහාය අවශ්ය බවත් ලෝක ආහාර වැඩසටහන ප්රකාශ කරනවා.
එළවලු, පළතුරු සහ ප්රෝටීන් බහුල ආහාර ලබා ගැනීම අඩු අදායම්ලාභී පවුල් වලට ඉතාමත් අසීරු කටයුත්තක් වී ඇතැයි ඔවුන් පවසනවා.
ලෝක ආහාර වැඩසටහනේ සමීක්ෂණයකට අනුව 86%ක් පවුල් වත්මන් අර්බුදයට මුහුණ දීම සඳහා ආහාරයට ගන්නා ප්රමාණය අඩු කිරීම, පෝෂ්යදායි ආහාර ගැනීම අඩු කිරීම හෝ ආහාර වේලක් නොගෙන සිටීම සිදු කරන බවයි හෙළිවී ඇත්තේ.
“ගැබිණි මව්වරුන් සෑම දිනකම පෝෂ්යදායි ආහාර ලබා ගන්න ඕනේ නමුත් දුප්පත් පවුල් වලට ඒ දේ සිදුකිරීමට අපහසුයි. ආහාර වේල් මග හැරීමෙන් කුස තුළ සිටින දරුවාගේ සෞඛ්යයත් අවදානමකට ලක් කරනවා” ලෝක ආහාර වැඩසටහනේ ආසියා සහ පැසිෆික් කලාපයේ නියෝජ්ය අධ්යක්ෂිකා ඇන්තියා වෙබ් (Anthea Webb) පවසනවා.
