ඉන්දීය අගමැති නරේන්ද්ර මෝදි මහතා සහ ශ්රී ලංකා ජනාධිපති ගෝඨාභය රාජපක්ෂ මහතා සම්බන්ධ කරමින් විදුලිබල මණ්ඩලයේ හිටපු සභාපති එම්.එම්.සී. ෆර්ඩිනැන්ඩු මහතා කෝප් කමිටුව හමුවේ කළ ප්රකාශයෙන් පසුව මේ වන විට ඉන්දියාව සහ ශ්රී ලංකාව අතර රාජ්යතාන්ත්රික ගැටලුවක් නිර්මාණය වීමේ අවදානමක් මතුව ඇති බව වාර්තා වේ.
ඒ අනුව මේ වන විට ශ්රී ලංකා රජය ඉන්දියාවෙන් තවත් ඩොලර් මිලියන 500ක ණය මුදලක් ලබාගැනීමට ඉල්ලුම් කර තිබුණද, එය නොලැබී යෑමේ තත්ත්වයක් මතුව ඇති බව රාජ්ය තාන්ත්රික ආරංචි මාර්ග සඳහන් කරයි.
මේ වන විටත් ඉන්දියාව ලබාදී ඇති ඩොලර් බිලියන එකහමාරක ණය පහසුකම අවසන්ව ඇති අතර, ඒ යටතේ ලබාගත් අවසන් ඉන්ධන නැවද මේ වන විට ලංකාවට ළඟාවී තිබේ.
ඒ අනුව මින් ඉදිරියට ඉන්දියාවෙන් පමණක් නොව, වෙනත් කිසිදු රටකින් ඉන්ධන ලබාගැනීමේ හැකියාවක් ලංකා ආණ්ඩුවට නොමැත.
කෙසේ වෙතත් ෆර්ඩිනැන්ඩු මහතා කළ ප්රකාශය සම්බන්ධයෙන් දැනටමත් ඉන්දීය ආණ්ඩුව සිය කනස්සල්ල පළකොට ඇති අතර, සුළං බල ව්යාපෘතිය ලබාගත් අදානි සමාගමද ඒ සම්බන්ධයෙන් සිය කලකිරීම ලංකා ආණ්ඩුව වෙත ප්රකාශ කොට තිබේ.
එපමණක් නොව, ෆර්ඩිනැන්ඩු මහතා කළ ප්රකාශය සම්බන්ධයෙන් ලබන සතියේදී කෝප් කමිටුව ඔහුව කැඳවා ප්රශ්න කිරීමට නියමිත බවද දැනගන්නට තිබේ.
මන්නාරම සුළං බල ව්යාපෘතිය අදානි සමාගමට ලබාදෙන ලෙස ඉන්දීය අගමැති නරේන්ද්ර මෝදි මහතා තමන්ට බලපෑම් කළ බව, ජනාධිපතිවරයා තමන්ට කී බව ෆර්ඩිනැන්ඩු මහතා මීට පෙර කෝප් කමිටුව හමුවේ ප්රකාශ කර තිබිණි.
