හෙට දිනයේ පාර්ලිමේන්තුවේදී නියෝජ්ය කතානායක ධූරය සදහා බොහෝ දුරට නම් 2ක් යෝජනා වනු ඇති බවත්, ඒ අනුව රහස් ජන්දයක් පැවැත්වීමේ වැඩි ඉඩකඩක් පවතින බවත් දැනගන්නට ඇත.
ජනාධිපතිවරයා විසින් රංජිත් සියඹලාපිටිය මහතා විසින් එවා තිබූ ඉල්ලා අස්වීමේ ලිපිය පිළිගනු ලැබූවද හෙට දිනයේදී යළිත් වරක් එම ධූරයට විපක්ෂය පාර්ශ්වයෙන් රංජිත් සියඹලාපිටිය මහතාගේ නම යෝජනා කරනු ඇති බව වාර්තා වේ.
ඒ අනුව ශ්රීලනිප මහලේකම් දයාසිරි ජයසේකර මහතා අද දිනයේදී විපක්ෂයේ නියෝජිතයන් සමග මේ සම්බන්ධයෙන් සාකච්ජා කොට විපක්ෂයේ සහාය ඒ සදහා ඉල්ලා ඇති බව පැවසේ.
එහිදී දයාසිරි ජයසේකර මහතා සජිත් ප්රේමදාස, රංජිත් මද්දුම බණ්ඩාර, විජිත හේරත් සහ එම්.ඒ. සුමන්තිරන් යන මහත්වරුන් මුණගැසී මේ පිළිබදව සාකච්ජා කර ඇති අතර ඊට විපක්ෂයේද කොළ එළිය දැල්වී ඇති බවක් දැනගන්නට ඇත.
ඒ අනුව අද දිනයේදී ආණ්ඩු පක්ෂයේ අසුන්ගෙන සිටි රංජිත් සියඹලාපිටිය මහතා හෙට දිනයේදී නිල වශයෙන් විපක්ෂයේ අසුන් ගැනීමට නියමිතව ඇති බවද දැනගන්නට තිබේ.
කෙසේවෙතත් ආණ්ඩුව විසින්ද නියෝජ්ය කතානායක ධූරය සදහා නමක් ඉදිරිපත් කිරීමට මේ වනවිට සැලසුම් කොට ඇති බව වාර්තා වේ.
ඒ අජිත් රාජපක්ෂ මහතාගේ නමය.
කෙසේවෙතත් නම් 2ක් යෝජනා වී රහස් ජන්දයකට යන ලකුණු පහළ වුවහොත් අවසන් මොහොතේ රාජපක්ෂ මහතාගේ නම ඉවත් කර ගැනීමට ආණ්ඩුව තීන්දු කර ඇති බවද දැනගන්නට තිබේ.
