සමාජ ආරක්ෂාව, සමාජ සුභසාධනය සහ සහෝදරත්වය ප්රියන්ත කුමාර දියවඩන මහතාගේ පවුලේ දූ දරුවන් වෙත යොමු විය යුතු බවත් සමගි ජන බලවේගය හැටියට තමන්ට හැකි පමණින් ඒ කටයුත්ත වෙනුවෙන් දායක වන බවත් විපක්ෂ නායක සජිත් ප්රේමදාස මහතා අද පැවසීය.
ප්රියන්ත මහතාව ඝාතනය කිරීමට කටයුතු කළ සාහසිකයින් අත්අඩංගුවට ගැනීම වෙනුවෙන් එරට අග්රාමාත්යවරයා ගනු ලැබූ සෘජු සහ ක්ශනික මැදිහත්වීම පිළිබඳව සිය කෘතවේදීත්වය පුද කරන බව පැවසූ විපක්ෂ නායකතුමා, ප්රියන්ත කුමාර මහතාට එරෙහිව පහරදීම් සිදුවන අවස්ථාවේදී ඔහු ආරක්ෂා කිරීමට කැපවූ සුවිශේෂී චරිතයටද සිය ප්රණාමය හිමි වන බව පැවසීය.
සියලු ආගම්වලින් කියාදෙන්නේ මානව හිතවාදීත්වය, සංහිඳියාව සහ එකිනෙකා කෙරෙහි ගෞරවය, ආදරය දැක්වීම බව පැවසූ විපක්ෂ නායකතුමා ඇතැම් පාර්ශව එය වරදවා වටහා ගනිමින් සිදු කරනු ලබන මිලේච්ඡ ක්රියා තරයේ හෙළාදකින බව ද පැවසීය.
පාකිස්තානයේ සියල්කොට් හිදී අමානුෂික ලෙස ඝාතනය කරනු ලැබූ ප්රියන්ත කුමාර මහතාගේ නිවසට දෙවැනි වරටත් අද (10) විපක්ෂ නායකතුමා පැමිණියේය. ප්රියන්ත මහතාගේ දරුවන් දෙදෙනාගේ අධ්යාපන කටයුතු වෙනුවෙන් ලක්ෂ 10 බැගින් වූ මූල්ය පරිත්යාග දෙකක් සිදු කළ විපක්ෂ නායකතුමා, එක් දරුවකු ගේ අධ්යාපන කටයුතු වෙනුවෙන් ලැප්ටොප් වර්ගයේ පරිගණකයක් ද පරිත්යාග කරනු ලැබීය.
අභාවප්රාප්ත ප්රියන්ත කුමාර මහතාගේ ඝාතනයට සම්බන්ධ චූදිතයින්ට එරෙහිව සිදුවන විමර්ශන කටයුතු පිළිබඳව සමගි ජන බලවේගය නිරන්තර අවධානයෙන් සිටින බව පැවසූ විපක්ෂ නායකතුමා අතිශය සාධාරණ පරීක්ෂණයක් තුළින් වැරදිකරුවන්ට නිසි දඩුවම් පැමිණවීමට පාකිස්ථාන රජය කටයුතු කරනු ඇතැයිද පැවසීය.
ප්රියන්ත කුමාර මහතාගේ දරු දෙදෙනාගේ අධ්යාපන කටයුතු සාර්ථක කර ගැනීම වෙනුවෙන් අවශ්ය කරන සහයෝගය ඉදිරියටත් ලබා දෙන බවද එහිදී විපක්ෂනායකතුමා සහතික විය.
