වෛද්යවරුන් ඇතුළු වෘත්තිකයන්ගෙන් ආදායම් බදු අය කිරීමේ දී දැනට පවතින බදු ප්රතිපත්තිය වෙනස් කරන්නැයි විශේෂඥ වෛද්ය අනුරුද්ධ පාදෙණිය අගමැති මහින්ද රාජපක්ෂගෙන් ඉල්ලීමක් කර ඇත.
රජයේ වෛද්ය නිලධාරීන්ගේ සංගමය වෙනුවෙන් විශේෂඥ වෛද්ය අනුරුද්ධ පාදෙණිය එම ඉල්ලීම කළේ අරලියගහ මන්දිරයේ ඊයේ (25) පැවැති හමුවකදීය.
වෛද්යවරුන් ඇතුළු වෘත්තිකයන්ගෙන් ආදායම් බදු අය කිරීමේ දී යහපාලන රජය සමයේ පැවැති බදු ප්රතිපත්තිය වෙනුවට මහින්ද රාජපක්ෂ යුගයේ බදු ප්රතිපත්තිය ක්රියාත්මක කරන ලෙස එහි දී ඉල්ලා ඇත.
සියයට 12ක්ව පැවැති ආදායම් බදු යහපාලන ආණ්ඩුවෙන් සියයට 24ක් දක්වා වැඩි කර ඇති බවත් වෘත්තිකයන්, ව්යාපාරිකයන් ලෙස සලකා ඒ මට්ටමෙන් මෙම බදු අය කිරීම සිදුවන බවත් වෛද්යවරයා පෙන්වා දෙයි.
ඒ අනුව අදාළ ගැටලු නිරාකරණය සම්බන්ධයෙන් පියවර ගැනීමට ඊට අදාළ පාර්ශ්ව සමග සාකච්ඡාවක් සූදානම් කරන ලෙස අගමැතිවරයා එහි දී අදාළ නිලධාරීන්ට උපදෙස් දී තිබේ.
රාජ්ය සේවකයන්ගේ වැටුප් සම්බන්ධයෙන් පවතින ගැටලු නිරාකරණයේ දී ඒ සම්බන්ධයෙන් මුදල් අමාත්යාංශය, රාජ්ය පරිපාලන අමාත්යාංශය එක්ව ජාතික වැටුප් ප්රතිපත්තිය මත පිහිටා වැටුප් කොමිසමේ නිර්දේශ අනුව කටයුතු කරන ලෙස රජයේ වෛද්ය නිලධාරීන්ගේ සංගමය මෙහි දී අගමැතිවරයාගෙන් ඉල්ලා ඇත.
මේ අතර වෛද්ය උපාධිය වයස අවුරුදු 22 වන විට සම්පූර්ණ කිරීම හා අනෙකුත් මූලික උපාධි වයස අවුරුදු 20 වන විට සම්පූර්ණ කිරීමට අදාළව රජයේ වෛද්ය නිලධාරීන්ගේ සංගමය අගමැතිවරයා වෙත යෝජනාවලියක් ද ඉදිරිපත් කර තිබේ.
