ඉකුත් 12 වනදාට යෙදුණු සිරකරු දිනයට සමගාමීව සිරකරුවන් 89 දෙනෙකුට ජනාධිපති පොදු සමාව යටතේ නිදහස හිමිව ඇත.
මෙලෙස ජනාධිපති පොදු සමාව යටතේ ඊයේ (19) දින නිදහස හිමිව ඇත්තේ සුළු වැරදී සඳහා බන්ධනාගාරගතව සිටි සිරකරුවන් 89 දෙනෙකුට බව බන්ධනාගාර දෙපාර්තමේන්තුව පැවසීය.
නිදහස හිමි වු සිරකරුවන් අතරට මහර බන්ධනාගාරයේ සිරකරුවන් 10 දෙනෙකු, බෝගම්බර බන්ධනාගාරයේ සිරකරුවන් 07 දෙනෙකු සහ වැලිකඩ බන්ධනාගාරයේ සිරකරුවන් 05 දෙනෙකු ද අයය.
ජනාධිපති සමාව හිමි වු සිරකරුවන් pcr පරීක්ෂණ සඳහා ඊයේ යොමු කෙරුණු අතර එම පරීක්ෂණ වාර්තා ලැබීමෙන් අනතුරුව කොරෝනා වෛරසය ආසාදනය නොවූ බවට තහවුරු වු සිරකරුවන් පමණක් බන්ධනාගාරවලින් නිදහස් කිරීමට බන්ධනාගාර දෙපාර්තමේන්තුව තීරණය කර ඇත.
ඒ අනුව ඊයේ එම වාර්තා ලැබුණු සිරකරුවන් පිරිසක් බන්ධනාගාර වලින් මුදා හැර තිබේ.
අනෙක් සිරකරුවන්ගේ වාර්තා අද දිනයේ ලැබීමට නියමිත බව හා ඒවා පරීක්ෂා කර අනෙකුත් සිරකරුවන් නිදහස් කරන බව බන්ධනාගාර දෙපාර්තමේන්තුව පැවසීය.
කෙසේවෙතත් සිරදඬුවමට ලක්ව අඟුණකොළපැලැස්ස බන්ධනාගාරයේ රඳවා සිටින හිටපු පාර්ලිමේන්තු මන්ත්රී රන්ජන් රාමනායකට ජනාධිපති පොදු සමාව හිමිව නැත.
ඔහු ජනාධිපති පොදු සමාව යටතේ නිදහස් කරන්නැයි ඉල්ලා පාර්ශව කිහිපයක් ජනාධිපතිවරයාගෙන් ඉල්ලීම් ද කර තිබිණ.
