අවසන් මොහොතේ බටහිර ඉන්දීය කොදෙව් සංචාරයට එක් නොවී පන්දු යැවීමේ පුහුණුකරු තනතුරින් ඉවත් වීමට කටයුතු කිරීම සම්බන්ධයෙන් ක්රීඩා අමාත්ය නාමල් රාජපක්ෂ මහතා පාර්ලිමේන්තුවේදී කළ දැඩි විවේචනයෙන් අනතුරුව චමින්ද වාස් සිය ට්විටර් ගිණුමේ පණිවුඩයක් තැබීමට පියවර ගෙන ඇත.
එහිදී චමින්ද වාස් සදහන් කොට ඇත්තේ වැටුප් ප්රශ්නය සම්බන්ධයෙන් තමන් ඉතා කාරුණික ඉල්ලීමක් ක්රිකට් ආයතනයෙන් කළ බවත්, ඔවුන් එය ප්රතික්ෂේප කළ බවත්ය. තමන්ට මේ මොහොතේ පැවසීමට ඇත්තේ එපමණක් පමණක් බවත්, තමන්ට සාධාරණය ඉටු වනු ඇති බවත් වාස් සිය පණිවුඩයෙන් දැනුම් දී තිබේ.
ඒ අනුව ඉදිරියේදී මේ සම්බන්ධයෙන් වාස් ප්රසිද්ධ අදහස් දැක්වීමක් කරනු ඇති බව දැනගන්නට ඇත.
කෙසේවෙතත් නාමල් රාජපක්ෂ මහතා ඊයේ දිනයේදී පාර්ලිමේන්තුවේදී සදහන් කර සිටියේ චමින්ද වාස් කළ ක්රියාව අනුමත කළ නොහැකි බවත්, ප්රශ්නයක් තිබුණා නම් එය සාකච්ජා කොට විසදා ගැනීමට ඉඩ තිබූ බවත්ය.
