විශේෂ කරුණු කිහිපයක් අනාවරණය කිරීම සඳහා මාධ්ය හමුවක් පවත්වන බව පවසමින් කර්මාන්ත ඇමැති විමල් වීරවංශගේ මාධ්ය ඒකකය විසින් ජනමාධ්ය ආයතන රැසක මාධ්යවේදීන් කැඳවා ඊයේ (11දා) පස්වරුවේ ඇමැතිවරයාගේ නිවස ඉදිරියේ පැය 3ක පමණ කාලයක් ‘රස්තියාදු’ කොට ඇත.
ජනමාධ්ය ආයතන වෙත දැනුම් දී තිබුණු ආකාරයට පස්වරු 3 ට දේශපාලන පක්ෂ 12ක නායකයන් එක්ව විශේෂ සාකච්ඡාවක් පැවැත්වීමට නියමිතව තිබූ අතර රටේ මතුව ඇති අර්බුදකාරී තත්ත්වයන් පිළිබඳව එහිදී අවධානය යොමු කිරීමට නියමිත බවද සඳහන් විය.
කෙසේ වෙතත් කොළඹ මලලසේකර මාවතේ ඇමැතිවරයාගේ නිවස අසලට පැමිණි මාධ්යවේදීන්ට එහි ගේට්ටු වසා තිබිණි. වරින් වර පූජ්ය අතුරලියේ රතන හිමි, වාසුදේව නානායක්කාර, දයාසිරි ජයසේකර, ටිරාන් අලස් ඇතුළු දේශපාලනඥයන් නිවස තුළට ගමන් කළ බව දැකගත හැකිවූ අතර වීරවංශ සහ ගම්මන්පිල යන ඇමැතිවරු නිවස තුළ සිටින බව ආරක්ෂක අංශ විසින් මාධ්යවේදීන්ට ප්රකාශ කෙරිණි. රැස්වීම අතරතුර වාසුදේව නානායක්කාර ඇමැතිවරයා එම පරිශ්රයෙන් පිටව ගියේය. මාධ්ය ඉදිරියේ සුළු වේලාවක් අදහස් පළකළ ඇමැතිවරයා මෙය සාමාන්ය සාකච්ඡාවක් බව ප්රකාශ කළේය.
විමල් වීරවංශ ඇමැතිවරයා සහ පොදුජන පෙරමුණ අතර පැවැති බෙදුම් රේඛාව දැන් මැකෙමින් පවතින බවත් අදාළ ගැටලුව අවසන්ව ඇති බවත් පැවැසූ ඇමැතිවරයා පිටව ගියේය.
අනතුරුව පස්වරු 5.30 ට පමණ තවත් දේශපාලනඥයන් කිහිප දෙනකු අදහස් නොදක්වාම ඉන් පිටව ගිය අතර අවසානයේ පස්වරු 5.45 ට පමණ පිටතට පැමිණියේ උදය ගම්මන්පිල ඇමැතිවරයාය. ඔහුද සඳහන් කරන ලද්දේ මෙය සාමාන්ය පරිදි පැවැත්වෙන ආණ්ඩු පක්ෂයේ දේශපාලන පක්ෂ නායක රැස්වීමක් පමණක් බවත් පවතින අර්බුදකාරී තත්ත්වයන් පිළිබඳව සාකච්ඡා කළ බවත්ය.
ඒ අනුව එම සාකච්ඡාවේදී ගනු ලැබූ කිසිදු සුවිශේෂී තීරණයක් පිළිබඳව දැනුම් දීමක් සිදු නොවීය. ගම්මන්පිල ඇමැතිවරයාගේ පිටව යෑමෙන් අනතුරුව ආරක්ෂකයන් විසින් දැනුම් දෙන ලද්දේ විමල් වීරවංශ ඇමැතිවරයා ඇතුළු අනෙක් දේශපාලනඥයන් නිවසේ අනෙක් දොරටුවෙන් පිටව ගිය බවයි.
