කොළඹ නගරයේ ජනතාවගේ සෞඛ්ය සහ සුවතාවය උදෙසා මීට වසර 15කට පෙර හිටපු ආරක්ෂක ලේකම් ගෝඨාභය රාජපක්ෂගේ මූලිකත්වයෙන් ඉදි කරන ලද සුප්රකට නිදහස් චතුරශ්ර ඇවිදින මංතීරුව (Independence Square walking path) මේ වන විට අතිශය අබලන් තත්ත්වයට පත්ව ඇති බව වාර්තා වනවා.Sri Lanka Latest News
මෙම ස්ථානය දෛනිකව පරිහරණය කරන වයස්ගත පුද්ගලයන් ඇතුළු දහස් සංඛ්යාත සිවිල් ජනතාව මේ හේතුවෙන් දැඩි අනතුරුදායක තත්ත්වයකට මුහුණ දී සිටින බවයි පාර්ලිමේන්තු මන්ත්රී හර්ෂ ද සිල්වා සිය නිල X සමාජ මාධ්ය ගිණුම ඔස්සේ විශේෂ අනාවරණයක් කරමින් පෙන්වා දෙන්නේ.
මන්ත්රීවරයා ප්රකාශ කරන්නේ, මංතීරුවේ ඇති ගල් කැට මතු වී රළු මතුපිටක් නිර්මාණය වීම නිසා ඇවිදින ජනතාව නිතර බිම ඇද වැටී තුවාල ලබන බවයි.
එමෙන්ම එහි ප්රතිසංස්කරණ කටයුතු සඳහා ගෙනවිත් දමා ඇති පස් ගොඩවල් ද මාස කිහිපයක් තිස්සේ කිසිදු ප්රයෝජනයක් නොගෙන එලෙසම දමා තිබීම හේතුවෙන් ජනතාව දැඩි අපහසුතාවයට පත්ව තිබෙනවා.
මෙම ගැටලුව සම්බන්ධයෙන් කොළඹ නගරාධිපතිනි ව්රායි කැලී බල්තසාර්ගේ සහ නාගරික සංවර්ධන අධිකාරියේ (UDA) කඩිනම් අවධානය යොමු කරන ලෙස මන්ත්රීවරයා ඉල්ලා සිටින අතර, ඊට ප්රතිචාර දක්වමින් නගරාධිපතිනිය සඳහන් කර ඇත්තේ මේ පිළිබඳව අදාළ විෂයභාර අමාත්යාංශය සහ අමාත්යවරයා වහාම දැනුවත් කිරීමට පියවර ගන්නා බවයි.
එහිදී හර්ෂ ද සිල්වා වැඩිදුරටත් යෝජනා කර සිටියේ, නාගරික සංවර්ධන අධිකාරිය යටතේ පවතින මෙම මංතීරුවේ නඩත්තු කටයුතු විධිමත්ව සිදු කිරීම සඳහා එය කොළඹ මහා නගර සභාව වෙත වහාම පවරා දිය යුතු බවයි.
