සෑම පුද්ගලයෙකුටම ප්රතිලාභ සැලසෙන, ගුණාත්මක සහ පහසුකම් සහිත පොදු ප්රවාහන ක්ෂේත්රයක් ගොඩනැගිය යුතුව ඇති බවත්, ඒ තුළින් ජනතාවට ප්රවාහනය සඳහා පෞද්ගලිකව දැරීමට සිදුව ඇති වැය බර අවම කරමින් ගුණාත්මක ප්රවාහන සේවාවක් රට තුළ සහතික කළ හැකි බවත් ජනාධිපති අනුර කුමාර දිසානායක මහතා සඳහන් කළේය.Sri Lanka Latest News
එබැවින් නිදහස් සෞඛ්ය සේවාවේ දියුණුව කෙරහි දක්වන අවධානයම, පොදු ප්රවාහන සේවාවේ උන්නතිය වෙනුවෙන් යොමු කිරීමේ වැදගත්කමද ජනාධිපතිවරයා පෙන්වා දුන්නේය.
ජනාධිපති අනුර කුමාර දිසානායක මහතා මේ බව සඳහන් කළේ ප්රවාහන, මහාමාර්ග සහ නාගරික සංවර්ධන අමාත්යාංශයට අදාළව 2026 වසරේ වෙන් කෙරුණු අයවැය ප්රතිපාදන මත ක්රියාත්මක ව්යාපෘතිවල ප්රගති සමාලෝචනය සහ 2027 අයවැය යෝජනා පිළිබඳ අද (13) පෙරවරුවේ ජනාධිපති ලේකම් කාර්යාලයේ පැවති අයවැය පූර්ව සාකච්ඡාවට එක් වෙමිනි.
නව සැලැස්මක් ඔස්සේ පොදු ප්රවාහන සේවාව දියුණු කිරීමේ අවශ්යතාව මෙහිදී පෙන්වා දුන් ජනාධිපතිවරයා ප්රවාහන සහ මහාමාර්ග ක්ෂේත්රය තුළ 2026 වසරේ ක්රියාත්මක ව්යාපෘතිවල ප්රගතිය වෙන් වෙන්ව විමසා බැලීය.
පැරණි බස් රථ සංචිත ක්රම ක්රමයෙන් ධාවනයෙන් ඉවත් කරමින් නව බස් රථ ධාවනයට එක් කිරීමේ වැඩපිළිවෙළ පිළිබඳවද මෙහිදී විශේෂ අවධානය යොමු කෙරුණු අතර නගරාශ්රිත කෙටි දුර ධාවනය සඳහා මෙට්රෝ බස් රථ වැනි පහසුකම් සහිත බස් රථ සංචිත ප්රතිස්ථාපනය කිරීමෙන් ජනතාවට සුවපහසු ගමනාගමනයක් සහතික කළ හැකි බව වැඩිදුරටත් සඳහන් කළේය.
නාගරික සංවර්ධන අමාත්යාංශය යටතේ ක්රියාත්මක ප්රධාන වැඩසටහන් වන මහල් නිවාස සංකීර්ණ ඉදිකිරීමේ ව්යාපෘති, නාගරික ප්රදේශ ආශ්රිත කසළ කළමනාකරණ ව්යාපෘති මෙන්ම CITY BRANDING ව්යාපෘතිය යටතේ ක්රියාත්මක වැඩසටහන්වල 2026 වසරේ ප්රගතිය, මෙම වසර් ජනතා අයිතියට පත් කළ හැකි ව්යාපෘති සහ ඉදිරි වසර වෙනුවෙන් අවශ්ය ප්රතිපාදන පිළිබඳ මෙහිදී පුළුල් ලෙස විමසා බැලිණි.
ලබන වසරේදී නිම කළ හැකි ව්යාපෘති තෝරා ගෙන ඒවාට ප්රමුඛතාව ලබා දෙමින් අයවැය ප්රතිපාදන වෙන් කිරීමට උපදෙස් දුන් ජනාධිපතිවරයා විදේශ ණය ආධාර යටතේ සිදු වන ව්යාපෘතිවලදී, අවසාන ප්රතිඵලය පිළිබඳ නිසි අවබෝධයකින් තොරව එම ව්යාපෘති අනුමත නොකළ යුතු බවටද උපදෙස් දුන්නේය.
ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක, ප්රවාහන සහ මහාමාර්ග නියෝජ්ය අමාත්ය වෛද්ය ප්රසන්න ගුණසේන, නාගරික සංවර්ධන නියෝජ්ය අමාත්ය එරංග ගුණසේකර, ජනාධිපති ලේකම් ආචාර්ය නන්දික සනත් කුමානායක, ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති, ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර,බලශක්ති අමාත්යාංශයේ ලේකම් සහ ජනාධිපති ජ්යෙෂ්ඨ අතිරේක ලේකම් රසල් අපොන්සු, මුදල්, ක්රමසම්පාදන සහ ආර්ථික සංවර්ධන අමාත්යාංශයේ ලේකම් ආචාර්ය හර්ෂණ සූරියප්පෙරුම යන මහත්වරුද, ප්රවාහන, මහාමාර්ග සහ නාගරික සංවර්ධන අමාත්යාංශයේ ලේකම්ද, මුදල් අමාත්යාංශයේ සහ ප්රවාහන, මහාමාර්ග සහ නාගරික සංවර්ධන අමාත්යාංශයේ සහ ඒ යටතේ ඇති ආයතනවල නිලධාරීහු පිරිසක්ද මෙම අවස්ථාවට සහභාගි වූහ.
ජනාධිපති මාධ්ය අංශය
2026-07-13
