මේ වසරේ මුල් කාර්තුව තුළ පමණක්, ඩොලර් මිලියන හයසියයක ආයෝජන කොළඹ වරාය නගරයට පැමිණ ඇති බව මුදල්, සැලසුම් හා ආර්ථික සංවර්ධන අමාත්යංශය පවසයි.Sri Lanka Latest News
කොළඹ වරාය නගරයට පැමිණ තිබෙන ආයෝජන අතර, මරිනා හොටෙල් හෝල්ඩිංග්ස් ලිමිටඩ් සහ ප්රයිම් මෙල්වා පෝර්ට් සිටි ලිමිටඩ් විසින් දියත් කර තිබෙන සංවර්ධන ව්යාපෘති තුනක් ඇතුළත් ය.
නව රජය, කොළඹ වරාය නගර ආර්ථික කොමිෂන් සභා පනත සම්මත කර තිබේ.
එය, කොළඹ වරාය නගරයට ආයෝජන ආකර්ශනය වැඩි වීමට හේතුවකි.
“ආයෝජනය පහසු කිරීම සඳහා, කොළඹ වරාය නගර ආර්ථික කොමිසම තනි කවුළුවක ආයෝජන පහසුකම් යාන්ත්රණයක් ක්රියාත්මක කරයි. ඉන්, ව්යාපාර ආරම්භ කිරීම සදහා රාජ්ය ආයතන කිහිපයක රස්තියාදු වීමේ කරදරයට මුහුණ දීමට තවදුරටත් ආයෝජකයන්ට සිද්ධ නොවේ. එක් තැනකින් ඔවුන්ට අවශ්ය සියල්ල සදහා අනුමැතිය ලබා ගැනීමට හැකියාව ලැබී තිබේ.
කොමිෂන් සභාව විසින් කඩිනම් ආයෝජන පහසුකම් සැලසීමේ වැඩසටහනක් ද හඳුන්වා දී ඇති අතර, එමඟින් ආයෝජකයින් බලයලත් පුද්ගලයෙකු ලෙස ලියාපදිංචි කිරීම දින හතක් ඇතුළත අවසන් කළ හැකි ය. එමෙන්ම ගිවිසුම් ඩිජිටල් ආකාරයෙන් ක්රියාත්මක කළ හැකි අතර, නිසි කඩිනම් අවශ්යතාවලට යටත්ව වැඩ කරන දින පහක් ඇතුළත විදේශීය සේවකයින් සඳහා වීසා අනුමත කළ හැකිය.
