ඉන්දියාවේ කේරළ ප්රාන්තයේ කාන්තාවන් සහ ළමුන්ගේ සුභසාධනය වෙනුවෙන් සුවිශේෂී ප්රගතිශීලී පියවර කිහිපයක් ගැනීමට එරට නව රජය තීරණය කර තිබේ. ඒ අනුව පාසල් ශිෂ්යාවන් සඳහා දින තුනක මාසික ඔසප් නිවාඩුවක් (Menstrual Leave) ලබා දීම සහ සේවකයන් 50කට වඩා වැඩි සියලුම සේවා ස්ථානවල ගුණාත්මක දිවා සුරැකුම් මධ්යස්ථාන පිහිටුවීම අනිවාර්ය කිරීම ඇතුළු යෝජනා රැසක් ප්රාන්ත රජය විසින් ප්රකාශයට පත් කර ඇත.Sri Lanka Latest News
ඉන්දියාවේ උත්තර ප්රදේශ්, දිල්ලි, කර්නාටක හෝ තමිල්නාඩු යන ප්රාන්ත නොව, මෙම විප්ලවීය තීරණය ගෙන ඇත්තේ කොන්ග්රස් පක්ෂය ප්රමුඛ UDF (United Democratic Front) සන්ධානය පාලනය කරන කේරළ ප්රාන්තය විසිනි.
“ඔසප් ගෞරවය” (Project Menstrual Dignity)..
නව මහ ඇමති වී. ඩී. සතීසන් (V D Satheesan) ගේ නායකත්වයෙන් යුත් රජයේ ප්රතිපත්ති ප්රකාශය සිකුරාදා ප්රාන්ත සභාවට ඉදිරිපත් කරමින් ආණ්ඩුකාර රාජේන්ද්ර විශ්වනාත් අර්ලෙකර් (Rajendra Vishwanath Arlekar) කියා සිටියේ, “ඔසප් ගෞරවය” (Project Menstrual Dignity) ව්යාපෘතිය යටතේ අධ්යාපන ආයතන සහ පොදු ස්ථාන කාන්තාවන්ට සහ දැරියන්ට වඩාත් හිතකාමී පරිසරයක් බවට පත් කිරීමට රජය කැපවී සිටින බවයි.
මෙම නිවාඩු කාලය තුළ පාසල් ශිෂ්යාවන්ගේ අධ්යාපන කටයුතු අතපසු වීම වැළැක්වීම සඳහා සති අන්තයේ විශේෂ උපකාරක පන්ති (Weekend Catch-up Classes) පැවැත්වීමට ද රජය සැලසුම් කර ඇත.
සේවා ස්ථානවල දිවා සුරැකුම් මධ්යස්ථාන අනිවාර්ය වෙයි..
1961 මාතෘ ප්රතිලාභ පනතට අනුකූලව නව ළමා සුරැකුම් රීති මාලාවක් හඳුන්වා දීමට කේරළ රජය පියවර ගෙන තිබේ. ඒ අනුව:
සියලුම රාජ්ය කාර්යාල, කාර්මික ආයතන, තොරතුරු තාක්ෂණ (IT) උද්යාන.
සේවකයන් 50කට වඩා සේවය කරන සියලුම පෞද්ගලික ආයතන.
ආරක්ෂිත සහ ඉහළ ප්රමිතියෙන් යුත් දිවා සුරැකුම් මධ්යස්ථාන සහ ළදරු සුරැකුම්ගාර (Creches) පවත්වාගෙන යාම අනිවාර්ය වේ.
ඉන්දියාවේ පළමු “අනාථ නිවාසවලින් තොර” ප්රාන්තය..
“නැතිබැරි සහ අනාථභාවයෙන් තොර කේරළයක්” (Destitute and Orphan-Free Kerala Initiative) බිහිකිරීමේ අරමුණින්, ළමා යුක්ති පනත (Juvenile Justice Act) පදනම් කරගනිමින් දරුවන් හදා වඩා ගැනීමට කැමැත්තවුන් දිරිගැන්වීමේ ව්යාපාර සහ පුහුණු කළ, මනාව වැටුප් ලබන සුරැකුම් පවුල් ජාලයක් (Foster Families) ගොඩනැගීමට රජය තීරණය කර ඇත. මේ හරහා ඉන්දියාවේ පළමු “අනාථ දරුවන් නොමැති ප්රාන්තය” බවට පත්වීමට කේරළය අපේක්ෂා කරයි.
කාන්තාවන්ට වඩාත්ම හිතකාමී ප්රාන්තය (Woman-Friendly State)..
කේරළය ඉන්දියාවේ “කාන්තාවන්ට වඩාත්ම හිතකාමී ප්රාන්තය” බවට පත්කිරීමේ පුළුල් සැලැස්ම යටතේ සේවා ස්ථානවල කාන්තාවන් සඳහා සමාන වැටුප් (Equal Pay) ලබාදීම සහ සියලුම ප්රධාන නගරවල පොදු වැසිකිළි පද්ධති ස්ථාපනය කිරීමට නියමිතය.
මීට අමතරව, ස්ථිර නොවන (Unorganised) අංශවල සේවය කරන කාන්තාවන් සඳහා මාස හයක මාතෘ නිවාඩු ලබාදීමටත්, සනීපාරක්ෂක තුවා (Sanitary Napkins) සහ පාවහන් ඇතුළු අත්යවශ්ය ද්රව්ය පහසුවෙන් ලබා ගැනීමට අවශ්ය පියවර ගන්නා බවත් ආණ්ඩුකාරවරයා වැඩිදුරටත් සඳහන් කළේය.
