ශ්රී ලංකාව ඇතුළු දකුණු ආසියාව පුරා සිටින බොහෝ ප්රේක්ෂකයන්ට පල්කි ෂර්මා යනු දැනටමත් හුරුපුරුදු මුහුණකි. ඇයගේ විමර්ශනාත්මක පුවත් ඉදිරිපත් කිරීම් සහ සම්මුඛ සාකච්ඡා ඉන්දියාවේ සීමාවන් ඉක්මවා ගොස් තිබේ. විශේෂයෙන්ම මෑතකදී ඇය ශ්රී ලංකා විදේශ අමාත්ය විජිත හේරත් සමග පැවැත්වූ අභියෝගාත්මක සම්මුඛ සාකච්ඡාව ශ්රී ලාංකික ප්රේක්ෂකයන් සහ දේශපාලන නිරීක්ෂකයන් අතර දැඩි අවධානයට ලක්විය. මේ නිසාම, ශ්රී ලංකාවේ මාධ්ය අවකාශය තුළ ඇය නන්නාඳුනන චරිතයක් නොවේ.Sri Lanka Latest News
කෙසේ වෙතත්, භූදේශපාලනය සහ ජාත්යන්තර සබඳතා පිළිබඳ වාර්තාකරණයේ නියැළෙන මාධ්යවේදිනියක වන ඇයගේ පෞරුෂයට එපිටින් තවත් ලෝකයක් පල්කි සතුය. ඒ සාම්ප්රදායික ඉන්දීය සාරි ව්යාපාරික ක්ෂේත්රයයි.
පල්කි ෂර්මා උපාධ්යාය 1982 මැයි 29 වැනි දින ඉන්දියාවේ රාජස්ථාන් ප්රාන්තයේ පිලානිහි උපත ලැබුවාය. ඇයගේ ළමා කාලයේ වැඩි කාලයක් ගත වූයේ දිල්ලි නුවරයි. එහිදී ඇය ලිවීමට, සන්නිවේදනයට සහ ජාත්යන්තර සබඳතා පිළිබඳ විෂයයන්ට දැඩි ඇල්මක් දැක්වූවාය.
මාධ්ය ක්ෂේත්රය වෘත්තියක් ලෙස තෝරාගැනීමේ අරමුණින් ඇය සන්නිවේදනය සහ ජනමාධ්යවේදය පිළිබඳ පශ්චාත් උපාධියක් ලබාගත්තාය. මෙම අධ්යාපනික පුහුණුව මගින් ඇයට මාධ්ය පිළිබඳ න්යායාත්මක මෙන්ම ප්රායෝගික දැනුමද ලැබුණු අතර, එය ඇයගේ වාර්තාකරණ සහ මාධ්යවේදී ශෛලිය හැඩගැස්වීමට මහෝපකාරී විය. සිය ශිෂ්ය අවධියේදී පවා ඇය ජාත්යන්තර දේශපාලනය සහ ගෝලීය රාජ්ය තාන්ත්රිකභාවය පිළිබඳ දැඩි උනන්දුවක් දැක්වූ බව පැවැසේ. පසුව ඇයගේ වෘත්තීය ජීවිතයේ කේන්ද්රස්ථානය බවට පත්වූයේද මෙම විෂයයන්මය.
පල්කි සිය මාධ්ය ගමන ආරම්භ කළේ 2000 දශකයේ මුල් භාගයේදීය. ඇයගේ මුල්ම වෘත්තීය අත්දැකීම් අතර ඉන්දියාවේ රාජ්ය රූපවාහිනී සේවය වන දූරදර්ශන්හි පුවත් නිවේදිකාවක සහ වැඩසටහන් ඉදිරිපත් කරන්නියක ලෙස කටයුතු කිරීම කැපී පෙනේ. මෙමගින් රූපවාහිනී මාධ්ය කලාව පිළිබඳ වටිනා අත්දැකීම් රාශියක් ඇය තමන් සතු කරගත්තාය.
කාලයත් සමග ඇය ඉන්දියාවේ ප්රධාන පෙළේ මාධ්ය ආයතන කිහිපයකම සේවය කළාය. ‘හින්දුස්තාන් ටයිම්ස්’ පුවත්පතේ මෙන්ම CNN-IBN නාලිකාවේ වාර්තාකාරිනියක, සංස්කාරකවරියක සහ නිවේදිකාවක ලෙස ඇය කටයුතු කළාය.
ඇයගේ වෘත්තීය ජීවිතයේ විශාලතම හැරවුම් ලක්ෂ්යය සනිටුහන් වූයේ ජාත්යන්තර පුවත් නාලිකාවක් වන WION සමග එක්වීමෙනි. එහිදී ‘Gravitas’ නමැති වැඩසටහන මෙහෙයවූවාය. ගෝලීය දේශපාලන වර්ධනයන් සහ භූදේශපාලනික විශ්ලේෂණයන් සඳහා වෙන් වූ මෙම වැඩසටහන, එහි ඇති සුවිශේෂ ඉදිරිපත් කිරීමේ රටාව සහ සංකීර්ණ ජාත්යන්තර ගැටලු සරලව පැහැදිලි කිරීම නිසා ඉතා ඉක්මනින් ජනප්රිය විය. පසුව ‘Vantage with Palki Sharma’ වැඩසටහන හරහා ගෝලීය කටයුතු පිළිබඳ සිය විශ්ලේෂණාත්මක භූමිකාව තවදුරටත් ඉදිරියට ගෙන ගියාය.
ලෝක දේශපාලනය කෙටි හා තේරුම්ගත හැකි අයුරින් විස්තර කිරීමට ඇති හැකියාව නිසා පල්කි විශාල ප්රසාදයක් දිනාගත්තාය. ජාත්යන්තර ගැටුම්වල සිට ආර්ථික වර්ධනයන් දක්වා වූ විවිධ තේමාවන් පිළිබඳ ඇයගේ අදහස් දැක්වීම් රූපවාහිනියෙන් මෙන්ම අන්තර්ජාලය ඔස්සේ මිලියන සංඛ්යාත පිරිසක් නැරඹූහ. මෑතකදී ඇය ශ්රී ලංකාවේ විදේශ අමාත්යවරයා සමග කළ සම්මුඛ සාකච්ඡාව ද මෙරට ප්රේක්ෂකයන් අතර ඇයගේ වෘත්තීය පෞරුෂය තවදුරටත් තහවුරු කිරීමට හේතු විය.
තමන්ගේ මාධ්ය වෘත්තිය සාර්ථකත්වයේ හිණිපෙත්තටම ළඟා වී තිබියදී, පල්කි 2016 වසරේදී කිසිවකුත් අපේක්ෂා නොකළ තීරණයක් ගත්තාය. ඒ විලාසිතා ව්යාපාරික ලෝකයට පිවිසීමයි.
ඇය ‘රේවා’(Reyva) නමින් සාරි සන්නාමයක් ආරම්භ කළාය. මෙය සම්ප්රදායික ඉන්දීය පේෂකර්ම කර්මාන්තය සහ නවීන සාරි විලාසිතා ඒකාබද්ධ කළ ව්යාපාරයකි. ජාත්යන්තර දේශපාලනය සහ රාජ්ය තාන්ත්රික සබඳතා ගැන කතාකරන පුවත් නිවේදිකාවක මෙවැනි ව්යාපාරයකට අතගැසීම බොහෝ දෙනකුට පුදුමයක් විය. රූපවාහිනී තිරය මත ඇය ගෝලීය ගැටුම් විශ්ලේෂණය කරන අතරතුර, තිරයෙන් බැහැරව ඉන්දියාවේ සම්ප්රදායික ඇඳුමක් කේන්ද්ර කරගත් සන්නාමයක් ගොඩනැගීම තුළ කැපීපෙනෙන පරස්පරතාවක් තිබිණි. මෙම අපූර්ව සංකලනය ඇය මෙවැනි තීරණයක් ගත්තේ ඇයිද යන්න පිළිබඳ බොහෝ දෙනා තුළ කුතුහලයක් ඇති කළේය.
පල්කිගේ මෙම තීරණයට ප්රධානතම හේතුවක් ලෙස සැලකිය හැක්කේ සම්ප්රදායික ඉන්දීය ඇඳුම් කෙරෙහි ඇය තුළ තිබූ පෞද්ගලික ඇල්මයි. රූපවාහිනී තිරය මත ඇය නිරතුරුවම ඉතා අලංකාර සාරිවලින් සැරසී සිටිනු ප්රේක්ෂකයන්ට දැකගත හැකි විය. කාලයත් සමග සාරිය ඇයගේ පොදු අනන්යතාවයේම කොටසක් බවට පත්විය.
ලොව පැරණිතම ඇඳුම් වර්ගවලින් එකක් වන සාරිය, ඉන්දියාවේ සියවස් ගණනාවක පේෂකර්ම උරුමය නියෝජනය කරයි. එහෙත් වර්තමාන නාගරික පරිසරය තුළ බොහෝ තරුණ වෘත්තිකයෝ පහසුව තකා බටහිර ඇඳුම්වලට වැඩි කැමැත්තක් දක්වති. ‘රේවා’ හරහා පල්කි උත්සාහ කළේ සම්ප්රදායික අත්යන්ත්ර සාරි නූතන වෘත්තීය ජීවිතයේ අනිවාර්ය කොටසක් බවට පත් කිරීමටයි. විශේෂයෙන්ම ‘චන්දේරි’ සහ ‘කෝටා සිල්ක්’ වැනි සැහැල්ලු මෙන්ම අලංකාර රෙදිපිළි කෙරෙහි ඇය වැඩි අවධානයක් යොමුකළාය.
සාරිය යනු මංගල උත්සවයකට හෝ විශේෂ උත්සවයකට පමණක් සීමාවූ ඇඳුමක් නොව, නූතන වෘත්තීය කාන්තාවකගේ පෞරුෂය විදහා දක්වන ප්රබල ඇඳුමක් ලෙස හඳුන්වා දීමට ඇය කටයුතු කළාය. ඒ අනුව බලන කල, ඇයගේ ව්යාපාරය හුදෙක් විලාසිතා ගැන පමණක් නොව, එය සංස්කෘතික කතාන්දරයක් කීමේ කලාවක්ද විය.
ප්රසිද්ධ චරිතයක් යම් සන්නාමයක් ආරම්භ කරන විට, ඒ සඳහා ඔවුන්ගේ ජනප්රියත්වය කෙළින්ම යොදාගන්නේද යන්න ගැන ප්රශ්න මතුවේ. පල්කිගේ වෘත්තීය ජීවිතය දෙස බැලීමේදී, ඇය කිසිවිටකත් ප්රවෘත්ති ප්රකාශය අතරතුර සිය ව්යාපාරය ප්රවර්ධනය කළ බවට සාක්ෂි නැත. මාධ්ය ආචාරධර්ම අනුව කර්තෘ මණ්ඩල ස්වාධීනත්වය සහ වාණිජමය අවශ්යතා එකිනෙකින් වෙන්ව තබාගත යුතුය.
කෙසේ වෙතත්, ඇයගේ ජනප්රියත්වය ව්යාපාරය පිළිබඳ දැනුවත්භාවයක් ඇති කිරීමට ඉබේම උපකාරී විය. මිලියන සංඛ්යාත පිරිසක් නරඹන රූපවාහිනී පෞරුෂයක් ලෙස ඇයට ප්රබල පෞද්ගලික සන්නාමයක් හිමිව තිබිණි. තිරය මත ඇය පෙනී සිටි ආකාරය සහ ඇය ඇඳි සාරි විලාසිතා, සම්ප්රදායික ඇඳුමකින් වුවද වෘත්තීයමය ප්රෞඪත්වයක් ලබාගත හැකි බවට නිහඬ පණිවුඩයක් ලබාදුන්නේය. ඇයගේ විලාසිතා අගය කළ ප්රේක්ෂකයන් අතර ඇගේ ව්යාපාරය කෙරෙහි අවධානය යොමුවීමට මෙය එක් හේතුවක් විය හැකිය.
තමන්ගේ වෘත්තීය ජීවිතය දෙස පමණක් බැලුවහොත් පල්කිට අලුතින් ව්යාපාරයක් ආරම්භ කිරීමට අවශ්යතාවක් නොතිබිණි. ඇය ඒ වනවිටත් ජාත්යන්තර වශයෙන් පිළිගත් මාධ්යවේදිනියකි. එසේ නම් ඇය මෙම අභියෝගය භාරගත්තේ ඇයි? ඒ සඳහා හේතු කිහිපයක් තිබිය හැකිය. ඉන් එකක් වන්නේ නිර්මාණාත්මක ප්රකාශනයයි. මාධ්යවේදය, විශේෂයෙන්ම දේශපාලන වාර්තාකරණය යනු දැඩි වෘත්තීය රාමුවක් තුළ සිදුවන්නකි. විලාසිතා නිර්මාණය ඇයට ඇයගේ කලාත්මක සහ නිර්මාණාත්මක පැත්ත ප්රකාශ කිරීමට අවස්ථාවක් ලබාදුන්නේය.
තවත් කාරණයක් විය හැක්කේ සංස්කෘතික උරුමය සුරැකීමයි. ඉන්දියාවේ සම්ප්රදායික අත්යන්ත්ර කර්මාන්තය මහා පරිමාණ රෙදි නිෂ්පාදනය හමුවේ අභියෝගයට ලක්ව ඇත. සාම්ප්රදායික පේෂකර්ම ශිල්පීන් දිරිමත් කිරීම සංස්කෘතික මෙහෙවරක් ලෙසද දැකිය හැකිය.
ඇගේ පෞද්ගලික අභියෝගයන්ද මෙයට හේතුවක් වන්නට ඇත. බොහෝ වෘත්තිකයන් තමන් නිරත වන ප්රධාන ක්ෂේත්රයෙන් බැහැරව අලුත් අත්දැකීම් ලැබීමට කැමැතිය. ව්යවසායකත්වය යනු මාධ්යවේදයට වඩා සම්පූර්ණයෙන්ම වෙනස් අභියෝගයකි.
කාර්යබහුල මාධ්ය ජීවිතයක් මෙහෙයවන අතරතුර විලාසිතා සන්නාමයක් පවත්වාගෙන යාම පහසු කටයුත්තක් නොවේ. කාලයත් සමග පල්කිගේ අවධානය නැවතත් පූර්ණ වශයෙන් මාධ්ය කලාව වෙත යොමුවූ අතර, වසර කිහිපයකට පසු සාරි ව්යාපාරයේ කටයුතු තරමක් අඩාළ විය.
එසේ වුවද, ඇයගේ වෘත්තීය ජීවිතයේ මෙම පරිච්ඡේදය ඉතා වැදගත් අත්හදා බැලීමකි. ඉන් ගම්ය වන්නේ නූතන වෘත්තිකයකු හුදෙක් එක් අනන්යතාවයකට පමණක් සීමා වියයුතු නැති බවයි. ජනමාධ්යවේදියෙකුට එකවර ව්යවසායකයකු, නිර්මාණකරුවකු මෙන්ම සංස්කෘතික උරුමයන් ප්රවර්ධනය කරන්නෙකුද විය හැකිය.
අද වනවිට පල්කි ෂර්මා උපාධ්යාය ලොව පුරා හඳුනාගනු ලබන්නේ ප්රධාන වශයෙන්ම දක්ෂ ජනමාධ්යවේදිනියක සහ ජාත්යන්තර කටයුතු පිළිබඳ විචාරිකාවක ලෙසය. ඇයගේ විශ්ලේෂණ දකුණු ආසියානු කලාපයේ දේශපාලන සාකච්ඡා කෙරෙහි ප්රබල බලපෑමක් ඇති කරයි. ශ්රී ලංකාවේ විදේශ අමාත්යවරයා සමග පැවැත්වූ සම්මුඛ සාකච්ඡාව හරහා ඇය මෙරට ජනතාවට තවදුරටත් සමීප විය.
කෙසේ වෙතත්, ඇයගේ වෘත්තීය පෞරුෂය පිටුපස ඇති මෙම අපූර්ව කතාව, එනම් ගෝලීය දේශපාලනය සහ සම්ප්රදායික පේෂකර්මය මුණගැසුණු තැන, ඇයගේ ගමනට තවත් අලුත් පැතිකඩක් එක් කරයි. ලෝක දේශපාලනය වැනි බරපතළ විෂයයන් සාකච්ඡා කරන මාධ්යවේදිනියක වුවද, සාරිය වැනි සදාකාලික සංස්කෘතික අංගයක් තුළින් ආශ්වාදයක් ලැබිය හැකි බව ඇය ප්රායෝගිකව පෙන්වා දී ඇත.
නිරංජන් චාමින්ද කරුණාතිලක
