මේ රට තවදුරට වළපල්ලටම නොදා…
ඉපදුණු රටේ ජනයා අද අසරණය
රට දසඅතේ නැග එනු ඇත අසහනය
තැන තැන ඇසෙන්නේ එනමුදු වැදි බණය
රට පාලනය බල මැන හරි අඩපණය
යල මහ දෙකන්නෙම ගොවිතැන වතුරේය
ගොවියගෙ ගමන අද බිහිසුණු අතුරේය
ගොවිබිම් නැසෙන බිය රට තොට පැතිරේය
දින දින විදෙස් දන මලු ටික ඉතිරේය
එළවළු ගොවියගෙත් ගොවිතැන නැසේවී
කුස පොතු වියැළි දරුවන් ටික හඬාවී
පාලක පිරිස නොසිතුව ලෙස නිදාවී
කතිරය පිදූ අය ඇත මං මුළාවී
මා දැල් තහනමක් ඇති බවද පැවසෙතී
බැලුවිට තගරිකාරයො මුහුදෙ සැඟවෙතී
පෙර පෙර කඳුළු ධීවර පිරිස ළතැවෙතී
බල නැති අය තැවෙති බලැතියෝ රජවෙතී
පෙරදිග ධාන්යාගාරය ලෙසට එදා
ගොවිතැන ඉහළ මට්ටමකට තිබිණි හදා
මේ රට තවදුරට වළපල්ලටම නොදා
පාලක පිරිස පල්ලම් බැස ගියොත් හොඳා
