දින ගණනාවක් තිස්සේ රට පුරා ගෑස් හිඟයක් මතුව තිබීම හේතුවෙන් පාරිභෝගිකයන් දැඩි ලෙස අසරණ වී ඇති බවත්, යළිත් රට ඇතුළේ ගෑස් පෝලිම් නිර්මාණය වී ඇති බවත් විපක්ෂ නායක සජිත් ප්රේමදාස මහතා පැවසීය.Sri Lanka Latest News
පාර්ලිමේන්තුවේදී අදහස් දක්වමින් ඒ මහතා සඳහන් කර සිටියේ වහාම මෙම ප්රශ්නයට මැදිහත්ව ජනතාවට ගෑස් ලබාදීමට පියවර ගන්නා ලෙසය.
ගෑස් නොමැති වීම රටේ ජනතාවගේ මානව අයිතිවාසිකම් උල්ලංඝනය වීමක් බවත්, එය ජීවත් වීමේ අයිතිය පවා ආරක්ෂා කිරීමට සම්බන්ධ බැවින් මේ සම්බන්ධයෙන් අවධානය යොමුකර කඩිනම් විසඳුම් ලබාදෙන ලෙස ඉල්ලා සිටින බවත් විපක්ෂ නායකවරයා පැවසීය.
කෙසේ වෙතත් මීට ප්රතිචාර දක්වමින් වෙළෙඳ අමාත්ය වසන්ත සමරසිංහ මහතා පාර්ලිමේන්තුවේදී අවධාරණය කර සිටියේ විපක්ෂය කියන ආකාරයේ ගෑස් හිඟයක් රට ඇතුළේ නොමැති බවකි.
ලාෆ්ස් ගෑස් බෙදාහැරීමේ ගැටලුවක් මතුව ඇති බව කී ඒ මහතා එම ගෑස් හිඟය මැඬපැවැත්වීම සඳහා වහාම පියවර ගන්නා ලෙසට එම සමාගමට දැනුම්දී ඇති බවත්, ලබන සඳුදා සහ අඟහරුවාදා වනවිට ගෑස් නැව් පැමිණීමට නියමිතව ඇති බවත් අමාත්යවරයා අවධාරණය කර සිටියේය.
‘ලාෆ්ස් සමාගමට නිසි දැනුම්දීම් කරලා තියෙනවා වහාම ගෑස් ගෙනල්ල බෙදාහරින්න කියලා. කලබලය නිසා ඉල්ලුම වැඩි වෙලා. ඒක තමයි මෙතැන වෙලා තියෙන්නේ. වෙළෙඳපොළේ ගෑස් හිඟයක් නෑ. පාරිභෝගිකයා රවටන්න එපා. ඉක්මනට ගෑස් ගෙනල්ලා බෙදන්න. මේ ප්රශ්නය ඇතිවෙලා තියෙන්නේ කහ පාට ගෑස් පාවිච්චි කරන අයට. ගෑස් හිඟයක් තියෙනවා කියලා ප්රවෘත්ති මවන පිරිසක් ඉන්නවා. කිසිසේත්ම ගෑස් හිඟයක් ඇතිවන්න ඉඩ තියන්නේ නෑ.’ යනුවෙන් එහිදී අමාත්යවරයා සඳහන් කර සිටියේය.
කෙසේ වෙතත් අමාත්යවරයා එසේ පැවැසුවද පසුගිය සිකුරාදා දිනය වනවිට කොළඹ සහ තදාසන්න ප්රදේශවලත්, නුවරඑළිය ඇතුළු කොළඹින් පිට ප්රදේශවලත් ගෑස් පෝලිම් මතුව තිබූ ආකාරයක් දැකගත හැකිවිය.
