ට්රම්ප් පසුගියදා ඉන්දියාව සහ බංග්ලාදේශය සමග තීරුබදු ගිවිසුමට අස්සන් කළේය. එම නව ගිවිසුමෙන් බංග්ලාදේශයට පනවන ලද තීරුබද්ද 19%ක් දක්වා අඩුවූ අතර, ඉන්දියාවට පනවන ලද තීරුබද්ද 18% දක්වා අඩුවිය. දැන් ලංකාවේ තීරුබද්ද ඉන්දියාවට සහ බංග්ලාදේශයට වඩා වැඩිය. ඇමෙරිකාවේ රාජ්ය දෙපාර්තමේන්තුවේ වෙළෙඳ නියෝජිතයන් ජනාධිපති අනුර හමුවෙන්න ආ අතරේ තීරුබදු ගිවිසුම අස්සන් කිරීමේ වැදගත්කම පෙන්වා දෙනු ලැබීය. ඇමෙරිකාව දිගින් දිගටම මේ සම්බන්ධයෙන් ලංකාව දැනුවත් කළත් ගිවිසුම අස්සන් කරන්න ආණ්ඩුව පැත්තෙන් උනන්දුවක් දැක්වූයේ නැත. ලංකාවට කලින් ඉන්දියාව සහ බංග්ලාදේශය සමග තීරුබදු ගිවිසුම් අස්සන් කිරීමෙන් ලංකාව අර්බුදයකට ලක්ව තිබේ. Sri Lanka Latest News
විදේශ අමාත්යාංශ ආරංචි මාර්ග සඳහන් කරන අන්දමට ලංකාව සමග තීරුබදු ගිවිසුම අස්සන් කිරීමේදී දැන් අලුත් කොන්දේසියක් පනවා තිබේ. එනම් ඉරානය සමග වෙළෙඳ ගනුදෙනු නතර කිරීමය. ඉරානය සමග වෙළෙඳ ගනුදෙනු කරන රටවලට තීරුබදු වැඩිකරනවා යැයි ට්රම්ප් පසුගියදා තර්ජනය කළේය. ලංකාව තෙල් සඳහා ඉරානයට ඇමෙරිකානු ඩොලර් මිලියන 250ක් ගෙවිය යුතුය. තෙල් ආනයනය කළේ 2012දීය. 2022 ආර්ථික අර්බුදය නිසා ලංකාවට ඒ මුදල් ගෙවිය නොහැකි විය. තෙල් වෙනුවට තේ අපනයනය කොට ඒ මුදල ගෙවන්න ලංකාව ඉරානය අතර ගිවිසුමක් අස්සන් තැබීය. සම්බාධක පනවන ලද ඉරානයෙන් තෙල් ආනයනය කිරීම සම්බන්ධයෙන් ඇමෙරිකාවේ විරෝධය 2013දී එවක ජනාධිපති මහින්ද රාජපක්ෂ මෙරට ඇමෙරිකානු තානාපතිනිය දැනුම් දුන්නාය. පසුගියදා ට්රම්ප් පැවසූ ඉරානය සමග වෙළෙඳ ගනුදෙනු කරන රටවල් අතරට ලංකාවද අයත්ය.
ලංකාව බංකොලොත් වූ වෙලාවේ තෙල් ණය ගෙවන්න තේ මිලදී ගැනීමෙන් ඉරානය ලංකාවට කළේ උදව්වකි. පසුගියදා ඉරානය ජාතික දිනය සමරද්දී ඇමැති නලින්ද ශ්රී ලංකා – ඉරාන මිතුදමෙහි වැදගත්කම අගය කරමින් කතා කළේය. ජවිපෙ සහ ඉරානය අතර මතවාදීමය සම්බන්ධයක් තිබේ. ජවිපෙ දෙවැනි කැරැල්ලට පෙර පැවැති පන්ති පහේදී ඇමෙරිකානු අධිරාජ්යවාදයට එරෙහි ඉරාන විප්ලවය ප්රධාන මාතෘකාවක් විය. 2020 ඇමෙරිකාව ඉරානයේ ප්රධාන හමුදා අණදෙන නිලධාරියාව ඝාතනය කළ අවස්ථාවේ ජවිපෙ දේශපාලන මණ්ඩලය ඇමෙරිකාව ලෝක සාමයට තර්ජනයක් බව පවසමින් එය හෙළාදැක්කේය. 2024දී ඉරානයට එල්ල වූ බෝම්බ ප්රහාරයේදීද ජවිපෙ ඉරානයට සහයෝගය පළ කළේය.
මෙවැනි පසුබිමක් තුළ ඉරානය සම්බන්ධයෙන් ඇමෙරිකාවේ කොන්දේසි ඉටුකිරීම ජවිපෙ ආණ්ඩුවට දුෂ්කර කාර්යයකි. තෙල් වෙනුවට තේ ගනුදෙනුව ට්රම්ප්ගේ ඉරාන තර්ජනයට අදාළ නොවන බව පෙන්වන්න ජවිපෙ ආණ්ඩුවට කොන්දක් තිබේදැයි අනාවැකි පළකළ නොහැකිය.
