ශ්රී ලංකාව සහ ඉරානය අතර පවතින දීර්ඝකාලීන ද්විපාර්ශ්වික සබඳතා සහ සහයෝගීතාව ඉදිරියටත් ශක්තිමත්ව පවත්වාගෙන යාමට රජය කැපවී කටයුතු කරන බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස අවධාරණය කරනවා.Sri Lanka Latest News
අමාත්යවරයා මේ බව පැවසුවේ කොළඹ පෞද්ගලික හෝටලයක පැවැති ඉරාන ඉස්ලාමීය ජනරජයේ ජාතික දින සැමරුම් උත්සවයට ප්රධාන ආරාධිතයා ලෙස එක්වෙමින්.
මෙහිදී අදහස් දැක්වූ අමාත්යවරයා, සුනාමි ව්යසනය, කොවිඩ් වසංගතය සහ මෑතකාලීන ආර්ථික අභියෝග වැනි ශ්රී ලංකාව මුහුණ දුන් දුෂ්කර අවස්ථාවන්හිදී ඉරානය ලබාදුන් සහයෝගය කෘතවේදීව සිහිපත් කර තිබෙනවා.
ඉරාන නායකත්වයට සහ එරට ජනතාවට ශ්රී ලංකා රජය වෙනුවෙන් සුබපැතුම් එක් කළ අමාත්යවරයා, දෙරට අතර පවතින රාජ්ය තාන්ත්රික මිතුදම අනාගතයේදී තවදුරටත් පුළුල් වන බව ද සඳහන් කළ බවයි සෞඛ්ය හා ජනමාධ්ය අමාත්යංශය නිවේදනයක් නිකුත් කරමින් සඳහන් කළේ.
ඉරානය සතු නවීන තාක්ෂණික දැනුම මෙරට සංවර්ධනයට යොදාගැනීමේ වැදගත්කම පිළිබඳව ද අමාත්යවරයා මෙහිදී අවධානය යොමු කර ඇති අතර, විශේෂයෙන්ම ඖෂධ නිෂ්පාදන ක්ෂේත්රයේ සහයෝගීතාව තුළින් මෙරට ජනතාවට උසස් සෞඛ්ය සේවාවක් ලබාදීමට අපේක්ෂා කරන බවද සඳහන් කර තිබෙනවා. -හිරු
