මාලිමා ආණ්ඩුව බලයට පැමිණීමේදී රටට දුන් එක් ප්රධාන පොරොන්දුවක් වූයේ මහබැංකු බැඳුම්කරු වංචාවේ මහමොළකරු වශයෙන් සැලකෙන හිටපු මහබැංකු අධිපති අර්ජුන් මහේන්ද්රන් බෙල්ලෙන් අල්ලා ලංකාවට කුදලාගෙන පැමිණෙන බවය. නමුත් ආණ්ඩුව බලයට පත්වී මේ වනවිට වසරකුත් ඉක්ම ගොස් තිබුණද, මහබැංකු වංචාව සිදුවී වසර 10ක් ගතවී එවැන්නක් සිදුවනවා තියා සිදුවන ලකුණක් හෝ දැකගන්නට නැත. ඒ අනුව අපේ රටේ ජනතාවට අර්ජුන් මහේන්ද්රන්වත්, මහබැංකු කොල්ලයත් අමතක වී යන ආකාරයක් දැකගන්නට ලැබිණි.Sri Lanka Latest News
නමුත් හදිසියේම අර්ජුන් මහේන්ද්රන් යළි කරළියට පැමිණියේ දැනට ලන්ඩනයේ වාසය කරන මාධ්යවේදියකු වන උවිඳු කුරුකුලසූරියගේ ෆේස්බුක් පිටුවෙනි. උවිඳු සමග පවතින හිතවත්කම නිසා අර්ජුන් උවිඳුට වීඩියෝ ඇමතුමක් ගෙන කතාබහක යෙදී තිබූ අතර, පසුව එය උවිඳු අර්ජුන්ගේ අවසරය මත සිය ෆේස්බුක් පිටුවේ පළකිරීමට කටයුතු කොට තිබිණි. උවිඳු එය පළ කර තිබුණේ ජනාධිපතිවරයාට ලබාදීමට පණිවුඩයක් අර්ජුන් තමාට ලබාදුන් බව කියමිනි. ඒ අනුව රනිල් ජනාධිපතිව සිටි කාලයේ පවා ප්රසිද්ධියේ එළියට ඒමට බියට පත්ව සිටි අර්ජුන් මහේන්ද්රන් අනුරගේ පාලන සමයේ පළමු වරට නොබියව එළියට ආ ආකාරයක් දැකගත හැකි විය. තමන් තවදුරටත් සැඟවී නොසිටින බවට අර්ජුන් මහේන්ද්රන් රටට දුන් පළමු ඉඟිය බවට පත්වූයේ එයය.
ඉන් අනතුරුව අර්ජුන් මහේන්ද්රන් පසුගිය සතියේ නැවත වතාවක් නව වසරට සුබ පතමින් පළමු වරට සිය බිරිය සමග සිටින ඡායාරූපයක් ප්රසිද්ධියට පත්කිරීමට පියවර ගත්තේය. එයද එළියට ආවේ උවිඳුගේ ෆේස්බුක් පිටුවෙනි. ඒ අනුව දැන් අර්ජුන් මහේන්ද්රන් කිසිදු බියක් සැකක් නොමැතිව තමන්ව බෙල්ලෙන් අල්ලාගෙන කුදලාගෙන එනවා යැයි කී ආණ්ඩුවක් බලයේ සිටියදී බිරිය සමග සිටින ඡායාරූපද ප්රසිද්ධියට පත්කරන තරමට කරළියට පැමිණ ඇති ආකාරයක් දැකගන්නට ඇත. එසේ අර්ජුන් එළියට පැමිණෙන්නේ තමන් අත්අඩංගුවට ගනු ඇති බවට වූ බිය පහව ගොස් ඇති නිසාද, එසේත් නැත්නම් යම් සැකසහිත ගනුදෙනුවක ප්රතිඵලයක්ද යන්න පිළිබඳ බොහෝ දෙනාට සැකයක් මතුවී ඇති ආකාරයක් දැකගන්නට පුළුවන. ඉදිරියේදී කටයුතු සිදුවන ආකාරය අනුව මෙම ඡායාරූපයේ පසුපස කතාව සියල්ලන්ටම දැකබලා ගැනීමට හැකිවනු ඇත.
