ලංකාව ෂැංහයි කෝපරේෂන් ඕගර්නයිසේෂන් එකේ නිරීක්ෂක තත්ත්වය ලබාගත්තේ 2009දීය. ඒ, එවක ජනාධිපති මහින්ද රාජපක්ෂ සහ චීනය අතර තිබුණු දැඩි සම්බන්ධය නිසාය. ලංකාවට නිරීක්ෂක තත්ත්වය ලැබුණු පසු දකුණු ආසියාවේ අනෙක් රටවල් වන නේපාලය සහ මාලදිවයිනටද නිරීක්ෂක තත්ත්වය ලැබිණි. නිරීක්ෂක තත්ත්වය ලැබීමෙන් පසු ලංකාව ක්රියාකාරී ලෙස ෂැංහයි සමුළුවලට සහභාගි විය. 2015 මෛත්රී-රනිල් ආණ්ඩු කාලයේ විදේශ නියෝජ්ය ඇමැති අජිත් පෙරේරා සහභාගි විය. 2023 ෂැංහයි සමුළුවට රනිල්ගේ ආණ්ඩුව යටතේද විදේශ අමාත්යාංශ නියෝජිතයෙක් සහභාගි විය. නමුත් මෙවර චීනයේ පැවැති ෂැංහයි සමුළුවට ලංකාවෙන් කිසිදු නියෝජිතයෙක් සහභාගි නොවීය.
2025 ෂැංහයි සමුළුව කැපීපෙනුණේ ඉන්දීය අගමැති මෝදි එම සමුළුවට සහභාගි වීම නිසාය. එය ට්රම්ප්ගේ තීරුබදු ප්රතිපත්තියට පසු මෝදි, ෂී ජින්පින්, පුටින් එකට එකතු වූ දුර්ලභ අවස්ථාවකි. මෙම සමුළුවට දකුණු ආසියාවේ අනෙකුත් ඔබ්සවර් තත්ත්වය දරන නේපාල අගමැති සහ මාලදිවයින ජනාධිපති සහභාගි වූහ. කැබිනට් ප්රකාශක ලංකාවේ ජනාධිපති ෂැංහයි සමුළුවට සහභාගි නොවීම ගැන ප්රශ්න කළ විට ඔහු කීවේ ජනාධිපතිට විදේශ සංචාර කිහිපයකටම යන්න තිබෙන නිසා ඔහු සහභාගි නොවූ බවය. එහෙත් විදේශ අමාත්යාංශ ප්රකාශක කියන්නේ සමුළුවට ජනාධිපතිට ආරාධනාවක් නොලැබුණු බවය. ඇතැම් මාධ්ය සඳහන් කරන්නේ ඇමෙරිකාවේ බලපෑම මත ලංකාව එම සමුළුවට සහභාගි නොවූ බවය. චීනය නේපාල අගමැතිට සහ මාලදිවයින් ජනාධිපතිට ආරාධනා කළා නම් ලංකාවට ආරාධනා නොකිරීමට හේතුවක් නැත. නමුත් ලංකාවේ ජනාධිපති එම සමුළුවට සහභාගි නොවන්නේ නම් ආරාධනා කිරීමේ තේරුමක් නැති බව චීනය තේරුම් ගත්තාද දන්නේ නැත. ලංකාවේ ජනාධිපති මීට පෙර රුසියාවේ බි්රක්ස් සමුළුවට සහභාගි වූයේද නැත. ඒ, රුසියා ජනාධිපතිගේ පුද්ගලික ආරාධනාවක් ප්රතික්ෂේප කරමිනි. චීනය එවැනි අපහසු තත්ත්වයකට පත්වෙන්න අකැමැති වූවා විය හැකිය.
හැබැයි චීනය ලබන මාසයේ අගමැතිනි හරිනි අමරසූරියට චීන සංචාරයක් සඳහා ආරාධනා කොට ඇති බව ආරංචි මාර්ග කියයි. හරිනි ඇමෙරිකාව සහ ඉන්දියාවට සමීප අයෙක් ලෙස ප්රකටය. එසේ තිබියදී චීනය ඇයට ආරාධනා කිරීම කුතුහලය දනවනසුළුය. හරිනි හා ජවිපෙ අතර ප්රශ්න ඇතැයි දේශපාලන කටකතා පැතිර පවතී. ඇයව අගමැති ධුරයෙන් ඉවත් කරන බවටද ඕපාදූප පැතිර තිබිණි. නමුත් මේ සතියේ පක්ෂ ලේකම් ටිල්වින් යාපනයට ගොස් හරිනිව අගමැති ධුරයෙන් ඉවත් නොකරන බව කීවේය. ටිල්වින්ගේ මේ සහතිකයත් සමග හරිනිගේ චීන සංචාරය සිත්ගන්නා සුළු වර්ධනයකි.
