2024 සැප්තැම්බර් 16 වැනිදාත් ඔක්තොම්බර් 16 වැනිදාත් අතර කාලයේදී අනිවාර්යෙන්ම ජනාධිපතිවරණය පැවැත්වෙන බවත් ජුලි මාසයේදී ජනාධිපතිවරණය කැඳවන්න නියමිත බවත් පාර්ලිමේන්තු මන්ත්රී එස් එම් මරික්කාර් මහතා පැවැසීය.Sri Lanka Latest News
අද (22) කොළඹ විපක්ෂ නායක කාර්යාලයේ පැවති මාධ්ය හමුවට සහභාගි වෙමින් පාර්ලිමේන්තු මන්ත්රී එස් එම් මරික්කාර් මහතා මේ බව සඳහන් කළේය. මෙම මාධ්ය හමුවේදී හිටපු පළාත් සභා මන්ත්රිනී නිරෝෂා අතුකෝරල මහත්මියද අදහස් දැක්වීය.
වැඩි දුරටත් අදහස් දක්වමින් මරික්කාර් මහතා පැවසුවේ ,
පොහොට්ටුවේ ජනාධිපති ධම්මික පෙරේරා බව පොදුජන පෙරමුණ සම්මේලනයේදී බැසිල් රාජපක්ෂ ඉඟියක් ලබාදුන් බවත් පොදුජන පෙරමුණේ ජ්යෙෂ්ඨයන්ට වඩා ප්රමුඛතාවයක් ධම්මික පෙරේරාට පොදුජන පෙරමුණ සම්මේලනයේදී ලබාදීලා තිබුණ බවත් පොදුජන පෙරමුණේ අපේක්ෂකයා ධම්මික පෙරේරා වීම තුළ රනිල් වික්රමසිංහට පොදුජන පෙරමුණෙන් ජනාධිපතිවරයට ඉදිරිපත් වීමට කිසිදු අවස්ථාවක් නැති බවත්ය.
අවුරුදු 60 ට වඩා අඩු ජනාධිපතිවරයෙක් ඉදිරියේදී රටේ ජනාධිපති වන බවත් තමන්ගේ සීයාගේ වයසේ සිටින පුද්ගලයෙකු රටේ ජනාධිපති කරන්න රටේ තරුණ පරම්පරාව අකමැති බවත් එස් එම් මරික්කාර් මහතා කීය.
පාර්ලිමේන්තු මන්ත්රී එස් එම් මරික්කාර් මහතා
‘‘එළඹෙන සැප්තැම්බර් 16 වැනිදා සහ ඔක්තොම්බර් 16 වැනිදාත් අතර කාලයේදී අනිවාර්යෙන්ම ජනාධිපතිවරණය පැවැත්වෙනවා. ජුලි මාසයේදී ජනාධිපතිවරණය කැඳවන්න නියමිතයි. වර්තමාන ජනාධිපති රනිල් වික්රමසිංහ එළඹෙන ජනාධිපතිවරණයට ඉල්ලන්නේ නැති බව සක්සුදක් සේ පැහැදිලියි. රනිල් වික්රමසිංහ ජනාධිපතිවරයා ඉදිරිපත් වුණ ජනාධිපතිවරණ දෙකකින් පරාජයට පත්වුණා. 2010 මැතිවරණයේදී පරදින බව දැනගෙන ඉත්තෙක්ව දැම්මා. 2015 ජනාධිපතිවරණයේදී ජයග්රහනය සඳහා පසුබිම තිබුණත් දිනන්න බැරි බව දැනගෙන ඔහු ඉල්ලුවේ නැ. ඔහු කළේ වෙනත් අශ්වයෙක් ගෙනත් දාලා ඒ අශ්වයාගේ කරපිට නැගපු එක. මේ සැරේ ජනාධිපතිධුරය පිනට හමුවුණා. ඒ නිසා 2024 ජනාධිපතිවරණය රනිල් වික්රමසිංහ ජනාධිපතිවරයා ඉල්ලන්නේ නෑ. මොකද පරදින බව දන්නවා.
පොදුජන පෙරමුණේ සම්මේලනයේදී බැසිල් රාජපක්ෂ ඉඟියක් ලබාදුන්නා පොහොට්ටුවේ ජනාධිපති ධම්මික පෙරේරා බව. පොදුජන පෙරමුණේ ජ්යෙෂ්ඨයන්ට වඩා ප්රමුඛතාවයක් ධම්මික පෙරේරාට පොදුජන පෙරමුණේ සම්මේලනයේදී ලබාදීලා තිබුණා. පොදුජන පෙරමුණේ අපේක්ෂකයා ධම්මික පෙරේරා වීම තුළ රනිල් වික්රමසිංහට පොදුජන පෙරමුණෙන් ජනාධිපතිවරයට ඉදිරිපත් වෙන්න අවස්ථාවක් නෑ. රනිල් වික්රමසිංහට එක්සත් ජාතික පක්ෂයෙන් ඉල්ලන්නේ බෑ එහෙම වුනොත් අන්ත පරාජයට පත් වෙනවා. ඒ නිසා රනිල් වික්රමසිංහ ඡන්දය ඉල්ලන්නේ නෑ.
රටේ තරුණ පරම්පරාව කැමති නෑ තමන්ගේ සීයාගේ වයස තිබෙන පුද්ගලයෙකු රටේ ජනාධිපති කරන්න. අවුරුදු 60 ට වඩා අඩු ජනාධිපතිවරයෙක් තමයි ඉදිරියේදී රටේ ජනාධිපති වෙන්නේ. ඒ ජනාධිපතිවරයා තෝරණ ජනාධිපති මැතිවරණය එළඹෙන සැප්තැම්බර් 16 වැනිදා ඔක්තොම්බර් 16 වැනිදාත් අතර කාලයේදී පැවැත්වෙනවා.
අධික ජීවන බරින් සහ බදු බරින් මිරිකිලා සිටින ජනතාව ජනවාරි මාසයේ අනිවාර්යෙන් පාරට බහිනවා. ජනතාව පාරට බැහැලා ඔවුන්ගේ විරෝධය සාමකාමීව ප්රජාතන්ත්රවාදීව ඉදිරිපත් කරයි. ඒ සාමකාමී විරෝධතා වෙනුවෙන් රජය වැරදි නියෝග ගිනියි. අපි කියනවා ඒ විරෝධතා වෙනුවෙන් වැරදි නියෝග ගන්න එපා. එහෙම වුනොත් වැරදි නියෝග ක්රියාත්මක කරපු උදවියට ඒවාට මුහුණ දෙන්න සිදුවෙයි.
නාමල් රාජපක්ෂ කියනවා වැට් බද්දට විරුද්ධයි අයවැයට විරුද්ධයි කියලා. මහින්ද රාජපක්ෂ නිවේදනයක් නිකුත් කරලා කියලා බදු බර වැඩයි කියලා. නමුත් මහින්ද රාජපක්ෂ වැට් බද්දට පක්ෂව ඡන්දය ලබා දුන්නා. වැට් බද්ද වැඩියි කියන මහින්ද රාජපක්ෂට තමන්ගේ මන්ත්රීවරුන්ට කියන්න තිබුණා වැට් බද්දට විරුද්ධව ඡන්දය ලබා දෙන්න කියලා. රාජපක්ෂවරුන්ගේ ආණ්ඩුව ආපු ගමන් ගජ මිතුරන්ට දොල පිදේනි දෙන්න බදු අඩු කළා. රාජ්ය ආදායම බිලියන 680 ක් පමණ රටට නැති කළේ මහින්ද රාජපක්ෂ. වැට් බද්ද වැඩි කරන එකටත් අත ඉස්සුවා , ණය සීමාව වැඩි කරන එකත් අත ඉස්සුවා
දැන් මාධ්ය නිවේදන නිකුත් කරමින් බොරු බයිලා ගහනවා. ඒ බයිලා වලට ජනතාව රැවටෙන්නේ නෑ. මැතිවරණයකදී රාජපක්ෂලාට හරි උත්තරය ලැබෙයි.‘‘
