කෘෂිකර්ම අමාත්යාංශයේ කෘෂිකර්ම සහකාර නිලධාරිනියක ලෙස සේවයේ නිරතව සිටි උපාධිධාරිනියකව හෝමාගම උසාවිය පාරේ නිවෙසකදී ඇගේ පෙම්වතා වන උපාධිධාරී කෘෂි නිලධාරියා විසින් ඝාතනය කර ඇත්තේ ඇගේ ඇස්වලට තියුණු ආයුධයකින් කිහිප වරක් ඇනීමෙන් පසු ගෙල කපා බව එම දේහය සම්බන්ධයෙන් කෙරුණු පශ්චාත් මරණ පරීක්ෂණයේදී අනාවරණය වී තිබේ.Sri Lanka Latest News
එම පශ්චාත් මරණ පරීක්ෂණය සිදු කළ හෝමාගම මූලික රෝහලේ අධිකරණ වෛද්ය නිලධාරී ධම්මි ලුවිස් හේවා මහත්මිය විසින් නිකුත් කළ පශ්චාත් මරණ පරීක්ෂණ වාර්තාවේ සඳහන් වන්නේ තියුණු ආයුධ ප්රහාර හේතුවෙන් ශරීරයෙන් අධික ලෙස රුධිරය වහනය වීම හේතුවෙන් ඇය මරණයට පත්ව ඇති බවය. මරණකාරිය අතවරයට හෝ දූෂණයට ලක්ව නැති බවත් එම වාර්තාවේ සඳහන් වේ.
සැකකරු ඇය ඝාතනයට යොදාගත් සෙන්ටිමීටර 27ක් දිගැති වක් වූ සෙන්ටිමීටර 17 තියුණු තත්ත්වයේ පවතින පිහියක් ද පොලිසිය මඟින් සොයා ගන්නා ලදි.
පසුගියදා (07) මෙලෙස ඝාතනයට ලක් වූයේ කෘෂිකර්ම සහකාර නිලධාරිනියක ලෙස සේවය කළ ඇහැලියගොඩ ගැටහැත්ත අම්පිටිය ප්රදේශයේ පදිංචිකාරියක වන විජේතුංග මුදියන්සේලාගේ අචිනි තුෂාරා විජේතුංග නමැති 31 හැවිරිදි අවිවාහක තරුණියකි.
ඝාතනයට ලක් වූ තරුණිය එදින සේවය නිම කර සිය මවට ඇමතුමක් දී ඉක්මනින් නිවෙස වෙත පැමිණෙන බවට පවසා ඇති බවත් ඇගේ දුරකතන ක්රියාවිරහිත වී නිවෙසට පැමිණීම ප්රමාද වීම නිසාවෙන් නිවැසියන් විසින් ඇය පිළිබඳ තොරතුරක් නැති බවට ඇහැලියගොඩ පොලිසියට ද පැමිණිල්ලක් කර තිබූ බව හෝමාගම මූලස්ථාන පොලිසියේ උසස් නිලධාරියෙක් පැවසීය.
එසේම සැකකාර ඝාතකයා සමඟ ඇය මාස හතරකට පමණ පෙර පෙම් සබඳතාවක් ආරම්භ කර ඇති බවත් දෙපාර්ශ්වයම දැනුවත්ව සිට ඇති බවත් ඉක්මනින් විවාහ වීමට අපේක්ෂාවෙන් සිට ඇති බවත් කළ විමර්ශනයේදී අනාවරණය වූ බව ද එම නිලධාරියා වැඩිදුරටත් පැවසීය.
හෝමාගම මූලස්ථාන පොලිසියේ ස්ථානාධිපති ප්රධාන පොලිස් පරීක්ෂක ප්රණීත් මානවඩු මහතාගේ දැනුම් දීම මත ඝාතනයට සම්බන්ධ සැකකරු කළුතර දකුණ පොලිසිය මඟින් අත්අඩංගුවට ගෙන තිබූ අතර සැකකරු කළුතර මහේස්ත්රාත් අධිකරණය වෙත ඉදිරිපත් කිරීමට නියමිතව තිබිණි.
