නොර්වුඩ්, නිව්වැලි වත්ත ප්රදේශයේ පිහිටි Norwood Fashions (Pvt) Ltd නම් වූ ඇගළුම් කර්මාන්ත ශාලාව වසාදමා තිබෙනවා. එය යලි විවෘත කරන ලෙසට ඇගළුම් කර්මාන්ත ශාලාවේ සේවය කළ පිරිස එය ඊයේ (23) දින උද්ඝෝෂණයක නිරතව තිබූ බව වාර්තා වෙනවා. (Sri Lanka Latest News)
තම කර්මාන්ත ශාලාවට ඇණවුම් නොලැබිම නිසා ඇගළුම් කර්මාන්ත ශාලාව තාවකාලිකව වසා දැමූ බවයි එහි පාලන අධිකාරිය මීට මාස හතරකට පෙර පවසා තිබුණේ. ඒ වන විටත් එහි 800ක් පමණ දෙනා සේවය කළ බව පැවසෙනවා.
“අපි අවුරුදු ගාණක් මේ ෆැක්ටරියේ වැඩ කළා. දැන් වහලා දාලා. අපිට වෙන රස්සාවක් හොයාගන්නත් නැහැ. පඩි දෙනවා කිව්වට මාස හතරක් දැන් අපිට පඩියක් නැහැ. බගවන්තලාව, නොර්වුඩ්, හැටන්, මස්කෙලිය, නල්ලතන්නිය වගේ තැන වලින් ආපි අය මේකේ වැඩ කළා. අපි පදිංචි වෙලා ඉන්නේ ඒ ඒ පැතිවල තියෙන වතු වල. දැන් අපිව වත්තේ වැඩට ගන්නෙත් නැහැ. වෙන රස්සාවල් ඇත්තෙත් නැහැ.
අපි මේ ගැන හැටන් සහකාර කම්කරු කොමසාරිස් කාර්යාලයටත් පැමිණිලි කළා. ඒත් උත්තරයක් නැහැ. අපි කියන්නේ මොකක්හරි උත්තරයක් හොයාගෙන මේ ෆැක්ටරිය ආයේ අරින්න කියන එක. එහෙම නැත්නම් මේක වහලම දානවනම් අපි හැමෝටම හරි හමන් වන්දියක්වත් දෙන්න ඕනේ” යි මෙම විරෝධයට එක්වූ සේවිකාවක් පවසා තිබෙනවා.
A5 News Sri Lanka
