රුපියල් මිලියන 2.5ක් වටිනා තොරතුරු තාක්ෂණ අධ්යාපන පාඨමාලාව වසර පහක් පුරා සිසුන් මිලියන 1ක් සඳහා නොමිලේ ලබා දීමට සැලසුම් කර ඇති බව, ඩී.පී. එඩියුකේෂන් අයි.ටී. කැම්පස් හි නිර්මාතෘ ධම්මික පෙරේරා මහතා පවසයි.Sri Lanka Latest News
පළමු අදියරේදී ත්රෛභාෂා කේතීකරණ පාඨමාලාව ගෝලීය වේදිකා හයක් ඒකාබද්ධ කරයි. දෙවන අදියරට Full Stack Developer සහ Cloud Computing පාඨමාලා ඇතුළත් වේ.
පාඨමාලා අන්තර්ගතය මොරටුව, රුහුණු සහ කැලණිය විශ්වවිද්යාල සහ SLASSCOM සමඟ එක්ව සංවර්ධනය කර ඇත.
මෙම මුලපිරීම හරහා ශ්රී ලංකාවට ආර්ථීක විභවයන්හි දැනුම නිසි ලෙස ප්රයෝජනයට ගැනීමට හැකි වන පරිදි ඉහළ තොරතුරු හා සන්නිවේදන තාක්ෂණයෙන් යුත් මානව සම්පත් සංචිතයක් ගොඩනැගෙනු ඇතැයි අවධාරණය කරයි.
ඩීපී එඩියුකේෂන් ආයතනය විසින් දැවැන්ත ආර්ථික වටිනාකමකින් යුත් මුලපිරීමක් ආරම්භ කර ඇත.
වසර පහක් තුළ ඇමරිකානු ඩොලර් බිලියන 7.5 ක් වටිනා ගෝලීය තොරතුරු තාක්ෂණ දැනුම සහ කුසලතා සපිරි සිසුන් මිලියනයක් බිහි කිරීම මෙහි අරමුණ වේ.
මෙම ව්යාපෘතිය හරහා දැනුම සහ කුසලතා ලබා දීමේ ඇස්තමේන්තුගත වටිනාකම එක් ශිෂ්යයෙකුට රුපියල් මිලියන 2.5 ක් වන අතර, එනම් සම්පූර්ණ වසර පහක කාලය තුළ රුපියල් බිලියන 2,500ක් හෙවත් ඇමෙරිකානු ඩොලර් බිලියන 7.5ක් වේ.
ධම්මික සහ ප්රිසිලා පෙරේරා පදනම විසින් මෙහෙයවනු ලබන විවෘත මාර්ගගත ක්රමය මගින් රට පුරා 331ක් වන ප්රාදේශීය ලේකම් (DS) කොට්ඨාශයන්හි ඩීපී එඩියුකේෂන් අයි. ටී. කැම්පස් පිහිටුවීමට අපේක්ෂා කරයි. මෙම මධ්යස්ථානවල සිසුන් 750 ත් 2,100 ත් අතර සංඛ්යාවක් සඳහා පහසුකම් සැලසෙනු ඇත. දැනට ක්රියාත්මක වන මධ්යස්ථාන 50 තුළ සිසුන් 40,000කට අධික සංඛ්යාවකට ඉගැන්වීම් කටයුතු සිදු කරනු ලබයි. මීට අමතරව, පළමු අදියර දෙක සඳහා සිසුන් 120,000 ක් මාර්ගගතව ඉගෙනුම් කටයුතුවල නිරත වේ. දැනට ඉදිවෙමින් පවතින මධ්යස්ථාන 30ත් සමඟින් 2023 වසර අවසන් වන විට තවත් මධ්යස්ථාන 50ක් විවෘත කිරීම සැලැස්මට ඇතුළත් වේ.
ඩීපී කෝඩින් පාසල පළමු අදියරේදී CODE.org, Thunkable, Pictoblox, Microbit, COSPACES සහ HTML ඇතුළුව ගෝලීය වේදිකා හයක් ඒකාබද්ධ කර ඇත. සිංහල, දෙමළ සහ ඉංග්රීසි භාෂාවලින් ඉගෙන ගත හැකි පාඨමාලාව ව්යාපෘති 324 කින් සමන්විත වේ. මෙම ව්යාපෘති 324 තුළ පැවරුම් 324 ක් ද ඇතුළත් වේ.
මෙම පාඨමාලාවේ ගෝලීය වටිනාකම (පැවරුම් හැර) ඇමරිකානු ඩොලර් 7,500 කි.
දෙවන අදියරට මොරටුව විශ්ව විද්යාලයේ Full Stack Developer සහ Cloud Computing පාඨමාලා ඇතුළත් වේ. තුන්වන අදියර මඟින් සිසුන්ට මොරටුව, කැලණිය සහ රුහුණු විශ්වවිද්යාල සමඟ එක්ව ඩීපී එඩියුකේෂන් අයි. ටී. කැම්පස් මගින් සකසන ලද පාඨමාලා නොමිලේ හැදෑරීමට ඉඩ සලසයි.
පාඨමාලා අන්තර්ගතය ඩීපී එඩියුකේෂන් ආයතනය, ශ්රී ලංකා විශ්ව විද්යාල, ශ්රී ලංකා මෘදුකාංග සේවා සමාගම් (SLASSCOM), මෙන් ම දැනුම සහ නවෝත්පාදන කර්මාන්තය සඳහා වන ජාතික වාණිජ මණ්ඩලය හා එක්ව සංවර්ධනය කර ඇත.
විෂය මාලාවේ පළමු සහ දෙවන අදියර සදහා ස්මාර්ට් ජංගම දුරකථන හරහා ප්රවේශ විය හැකි අතර, තෙවන සහ අවසාන අදියර සඳහා පරිගණකයක් හෝ ලැප්ටොප් පරිගණකයක් අවශ්ය වේ. පාසල් ශිෂ්යයෙකුට (සතියකට පැය දෙකක කාලයක් සහ පැවරුම් සහිතව) වසර දෙකකින් සහ පාසල් අවසන් කළ ශිෂ්යයෙකුට මාස හයක් ඇතුළත (සතියකට පැය 12ක් වැය කරමින්) පාඨමාලාව අවසන් කිරීමට හැකි වන පරිදි සකස් කර ඇත.
ඩීපී එඩියුකේෂන් අයි.ටී. කැම්පස් හි නිර්මාතෘ ධම්මික පෙරේරා මහතා පවසන පරිදි, මෙම දැවැන්ත ව්යාපෘතිය තුළින් ඩොලර් බිලියන 7.5ක් හෙවත් රු. බිලියන 2,500ක් වටිනා තොරතුරු තාක්ෂණ දැනුමෙන් හා කුසලතා වලින් පරිපූර්ණ සිසුන් පිරිසක් ඉදිරි වසර 5 තුළ නිර්මාණය වේ. මෙම නිපුණතා සහිත මානව සම්පත් සංචිතය, ශ්රී ලංකාව තුළ ඵලදායීව භාවිතා කිරීමටත්, විදේශ විනිමය ඉපැයීම් ඉහළ නැංවීමටත්, උපයෝගී කර ගත හැකි බව ඔහු වැඩිදුරටත් ප්රකාශ කර සිටියි.
