කොට්ටාව ධර්මපාල විද්යාලය ආසන්නයේ පිහිටි පෞද්ගලික රෝහලකට අයත් වෛද්ය රසායනාගාරයක් තුළදී එහි සේවකයකුට වෙඩි තබා ඝාතනය කිරීම ඩුබායි පාතාලයේ වැඩක් බවට සැක කරන තොරතුරු රැසක් විමර්ශන කණ්ඩායම් වෙත ලැබී තිබේ. Sri Lanka Latest News
හෝමගම ප්රදේශයේ මත්කුඩු ජාවාරම ඩුබායි සිට මෙහෙයවන එස්.එෆ්. ජගත් නමැති පාතාල අපරාධකරු විසින් මෙම වෙඩි තැබීම මෙහෙයවා ඇතැයි විමර්ශන කණ්ඩායම් විසින් සැක කරයි. ඊට මුල්වී ඇත්තේ ඝාතනයට ලක්වූ රසායනාගාර සේවකයා සහ එම පාතාල අපරාධකරු සමඟ පැවති හිත් අමනාපයක් විය හැකි බව උසස් පොලිස් නිලධාරියෙක් සඳහන් කළේය.
මෙසේ ඝාතනය වී ඇත්තේ මත්තේගොඩ නාමල් උයනේ පදිංචිව සිටි පැලමණ්ඩල නායකගේ මිහිරාන් ප්රභාත් පත්මසිරි නමැති 33 හැවිරිදි වියේ පසුවූ තරුණයෙකි. අපරාධ පරීක්ෂණ දෙපාර්තමේන්තු අත්අඩංගුවේ සිටියදී ආයුධ පෙන්වීමට ගොස් පොලිසිය සමඟ ගැටී මරුමුවට පත්වූ කොස්ගොඩ තාරක නමැති පාතාල අපරාධකරු සමඟ මෙම තරුණයා ඉතා කිට්ටුවෙන් ඇසුරු කර ඇති බවට ද තොරතුරු ඇතැයි බුද්ධි අංශ සඳහන් කරයි. කොස්ගොඩ තාරක සමඟ ගඟන නමැති අපරාධකරුවකු ද සිට ඇති බවත් ඔහු මෑතකදී බන්ධනාගාරයෙන් ඇප මත නිදහස් වී සිටින බවත් බුද්ධි අංශ කියයි. එම ගඟන නමැති අපරාධකරු සමඟ ද මෙම තරුණයා සම්බන්ධකම් පවත්වා ඇති බව බුද්ධි අංශ කියයි.
