සංචරණ සීමා පනවා තිබීම හේතුවෙන් දඹුල්ල ආර්ථික මධ්යස්ථානයේ එළවළු කිලෝ ලක්ෂ 25ක් ගොඩගැසී ඇති බවට සමගි ජන බලවේගයේ මන්ත්රීනී රෝහිණී කවිරත්න මහත්මිය කළ ප්රකාශය සම්පූර්ණයෙන්ම අසත්යයක් බව මාතලේ දිස්ත්රික් පොදුජන පෙරමුණු පාර්ලිමේන්තු මන්ත්රී ප්රමිත බණ්ඩාර තෙන්නකෝන් මහතා පැවසීය.
ඒ මහතා පෙන්වා දුන්නේ අද (14) දහවල් 12 වනවිට ආර්ථික මධ්යස්ථානය වෙත පැමිණ සිටි සියලු ගොවීන්ගේ එළවළු ද්රව්ය මිලදී ගැනීමට ආණ්ඩුව පියවර ගත් බවකි.
තමන් අද දිනයේ රාත්රී වනතුරුත් දඹුල්ල ආර්ථික මධ්යස්ථානයේ සිටි බව කී මන්ත්රීවරයා කවිරත්න මන්ත්රීවරිය කී ආකාරයට එළවළු කිලෝ ලක්ෂ 25ක් නොතිබූ බවත්, එම ප්රමාණය සාමාන්ය දිනක මධ්යස්ථානයට පැමිණෙන එළවළු මෙන් තුන්ගුණයක් බවත් කියා සිටියේය.
සංචරණ සීමා හේතුවෙන් සහ රාමසාන් දිනය වීම හේතුවෙන් අද එළවලු සැපයුම අවම වී ඇති බවත්, එසේවුවත් පැමිණ සිටි සියලුම ගොවීන්ගේ එළවළු මිලදී ගැනීමට ආණ්ඩුව කටයුතු කළ බවත් මන්ත්රීවරයා කීය.
මහභාණ්ඩාගාර නිලධාරීන් ඒ සදහා අවශ්ය මුදල් නිකුත් කළ බව කී මන්ත්රීවරයා දිසාපතිවරයා, ප්රාදේශීය ලේකම්වරයා සහ යුද හමුදාව මැදිහත්ව මෙම එළවළු මිලදී ගැනීම සිදු කළ බවද කීය.
එමනිසා කොළඹ සිට මාධ්යයට අසත්ය ප්රකාශ නිකුත් නොකර දඹුල්ලට පැමිණ සත්ය තත්ත්වය දැකබලා ගන්නා ලෙස තමන් කවිරත්න මන්ත්රීවරියට කියන බවද ඒ මහතා වැඩිදුරටත් කීය.
