ප්රධාන නගර සංවර්ධන වැඩසටහන යටතේ ක්රියාත්මක ගාල්ල නගර සංවර්ධන ව්යාපෘතිය කඩිනම් කිරීම පිළිබඳ සාකච්ඡාවක් ජනාධිපති අනුර කුමාර දිසානායක මහතාගේ ප්රධානත්වයෙන් අද (10) පස්වරුවේ ජනාධිපති කාර්යාලයේදී පැවැත්විණි.Sri Lanka Latest News
ලෝක උරුමයක් වන ගාල්ල නගරය සංස්කෘතික සහ සංචාරක පුරවරයක් ලෙස සංවර්ධනය කිරීම වෙනුවෙන් ක්රියාත්මක වැඩසටහන්වල ප්රගතිය මෙහිදී විමසා බැලූ ජනාධිපතිවරයා එය ක්රියාත්මක කිරීමේදී මතුව ඇති ගැටලු සහ ඊට ලබා දිය හැකි විසඳුම් පිළිබඳවද සාකච්ඡා කළේය.
මේ යටතේ ගාල්ල නගර මධ්යයේ පවතින පොලිස් ස්ථානය, තැපැල් කාර්යාලය, බන්ධනාගාරය සහ හෙද පුහුණු පාසල වෙනත් ස්ථානවල ස්ථාපිත කිරීම සඳහා අවශ්ය ඉඩම් නිදහස් කර ගැනීම පිළිබඳවද මෙහිදි විශේෂ අවධානය යොමු විය.
විධිමත් නගර සැලැස්මක් තුළ ගාල්ල නගරය සංවර්ධනය කිරිමේ අවශ්යතාව මෙහිදී පෙන්වා දුන් ජනාධිපතිවරයා, නගරය සැලසුම් කිරීම, රාජ්ය ආයතන ගාල්ල කොටුවෙන් පිටත ස්ථාපනය, ගොඩනැගිලි, මාර්ග ඇතුළු යටිතල පහසුකම් ඉදිකිරීම හා භූමිය උපරිම ඵලදායීතාවකින් සංවර්ධනය සඳහා යොදා ගැනීමේදී සියලු රාජ්ය ආයතන ඒකාබද්ධව කටයුතු කිරිමේ වැදගත්කම අවධාරණය කළේය. එහිදී නාගරික සංවර්ධන අධිකාරියට සුවිශේෂී වගකීමක් පැවරෙන බවද ජනාධිපතිවරයා පෙන්වා දුන්නේය.
එමෙන්ම, ආයෝජන ගෙන්වා ගැනීම සහ නව ඉදිකිරීම් සඳහා ප්රතිපාදන වෙන් කර ගැනීම පිළිබඳවද මෙහිදී සාකච්ඡා විය.
ගාලු කොටුව සහ ඒ ආශ්රිත මුහුදු තීරය සංචාරක ආකර්ෂණය දිනාගත් ප්රදේශයක් ලෙස සංවර්ධනය කිරීම පිළිබඳවද පුළුල් ලෙස සාකච්ඡා කෙරිණි.
ජනතාවට වඩා පහසුවෙන් සේවා ලබා ගත හැකි අන්දමින් ගාල්ල නගරයේ සියලු රජයේ කාර්යාල එක් පරිපාලන ගොඩනැගිල්ලකට ගෙන ඒම සහ දැනට පවතින සෞන්දර්ය පාසල සංවර්ධනය පිළිබඳවද මෙහිදී සාකච්ඡා කෙරිණි.
වෘත්තීය අධ්යාපන නියෝජ්ය අමාත්ය නලින් හේවගේ, පාර්ලිමේන්තු මන්ත්රීවරුන් වන නිශාන්ත පෙරේරා, ටී.කේ. ජයසුන්දර, නිශාන්ත සමරවීර, හසාරා ලියනගේ, තිලංක යූ. ගමගේ යන මහත්ම මහත්මීහුද, ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, නිවාස, ඉදිකිරීම් හා ජල සම්පාදන අමාත්යාංශයේ ලේකම් ඉංජිනේරු එල්.බී.කුමුදුලාල්, සෞඛ්ය අමාත්යාංශයේ අධ්යක්ෂක ජනරාල් එච්.එම්. එන්. දිනිප්රිය, ජාතික ජලසම්පාදන දෙපාර්තමේන්තුවේ අතිරේක අධ්යක්ෂ ජෙනරාල් වී. වාසුදේවන්, ජාතික ක්රම සම්පාදන දෙපාර්තමේන්තුවේ අධ්යක්ෂ එස්. ඒ.ආර්. තරංග, ජාතික අයවැය දෙපාර්තමේන්තුවේ අධ්යක්ෂ ජෙනරාල් ජූඩ් නිලුක්ෂාන්, අධිකරණ සහ ජාතික ඒකාබද්ධතා අමාත්යාංශයේ අධ්යක්ෂ ජෙනරාල් ඉංජිනේරු එස්.ඒ. කේ. සුබසිංහ, ජල සම්පාදන මණ්ඩලයේ අතිරේක සාමාන්යාධිකාරී ඉංජිනේරු එන්.ආර්.එස්. වික්රමසිංහ, දකුණු පළාත් ප්රධාන ලේකම් චන්දිම සී. මුහන්දිරම්ගේ, දකුණු පළාත් ප්රධාන අමාත්යාංශයේ ලේකම් ක්රිසන්ත ඩබ්. මහේන්ද්ර, දකුණු පළාත් නාගරික සංවර්ධන අධිකාරියේ අධ්යක්ෂ තුෂානි ද අල්විස්, ගාල්ල දිස්ත්රික් ලේකම් කේ. යූ. චන්ද්රලාල් යන මහත් මහත්මීහු ඇතුළු නාගරික සංවර්ධන අධිකාරියේ සහ ගාල්ල නගර සංවර්ධන ව්යාපෘතිය ක්රියාත්මක කිරීමට අදාළ සියලු ආයතනවල නිලධාරීහු සහ නියෝජිතයෝ මෙම සාකච්ඡාවට එක්ව සිටියහ.
ජනාධිපති මාධ්ය අංශය
2026-06-10
