ගල්කිස්ස මහේස්ත්රාත් අධිකරණ භූමියේදී ඇති වූ සිද්ධියක් මුල් කරගෙන පොලීසිය විසින් තමන්ව අත්අඩංගුවට ගැනීම වළක්වන නියෝගයක් නිකුත් කරන ලෙස ඉල්ලා නීතීඥ ගුණරත්න වන්නිනායක මහතා විසින් සිය නීතිඥවරු මාර්ගයෙන් ඉදිරිපත් කළ රිට් පෙත්සම යළි ජනවාරි මස 14 වනදා කැඳවන ලෙස අභියාචනාධිකරණය අද (10) නියෝග කළා.Sri Lanka Latest News
පෙත්සම අද අභියාචනාධිකරණයේ සභාපති විනිසුරු රොහාන්ත අබේසූරිය සහ ප්රියන්ත ප්රනාන්දු යන අභියාචනාධිකරණ විනිසුරු මඬුල්ල හමුවේ කැඳවූවා.
නඩුව කැඳ වූ අවස්ථාවේ පෙත්සම්කාර ගුණරත්න වන්නිනායක මහතා වෙනුවෙන් පෙනී සිටි ජනාධිපති නීතිඥ උපුල් ජයසූරිය මහතා අධිකරණය හමුවේ කරුණු දක්වමින් සිය සේවාදායකයාට ගල්කිස්ස අධිකරණය භූමියේදී පහරදුන් පොලිස් නිලධාරියා එම සිද්ධියට පෙර දඬුවම් මාරුවක් ලබා ගල්කිස්ස පොලිස් ස්ථානයට පැමිණි අයෙකු බව සඳහන් කළා.
එම දඬුවම් මාරුවට හේතු වූ චෝදනා සම්බන්ධයෙන් මෙතෙක් විමර්ශන සිදු වී නොමැති බවත් ජනාධිපති නීතිඥවරයා චෝදනා කළා.
මෙහිදී රජයේ නීතිඥවරිය අධිකරණය හමුවේ කරුණු දක්වමින් පෙත්සම්කරු මේ වනවිට අධිකරණයට ඉදිරිපත් වී ඇප මත මුදා හැර තිබෙන අතර පෙත්සමෙන් ඉල්ලා තිබෙන ඉල්ලීම් දැනටමත් ඉටු වී තිබෙන බව සඳහන් කළා.
කෙසේ වෙතත් පෙත්සම්කාර පාර්ශවය වෙනුවෙන් පෙනී සිටි ජනාධිපති නීතිඥවරයා අධිකරණය හමුවේ ඉල්ලීමක් කරමින් මෙම පෙත්සම සඳහා කැඳවීම් දිනයක් ලබා දෙන ලෙස ඉල්ලා සිටියා.
එම ඉල්ලීම සලකා බැලූ අභියාචනාධිකරණය අදාල පෙත්සම ජනවාරි මස සඳහා 14 වනදා කැඳවන ලෙස නියෝග කළා.
