බන්ධනාගාර 28ක තදබදය මේ මාසය අගභාගය වනවිට තරමක් අඩුවී ඇති බව බන්ධනාගාර කොමසාරිස් ගාමිණී දිසානායක මහතා ‘මව්රට’ට පැවැසීය. (Sri Lanka Latest News)
පසුගියදා බන්ධනාගාර තුළ රැඳවූවන් 30,000ක් පමණ රඳවා සිටි අතර, එම සංඛ්යාව පසුගිය 26 වැනිදා වනවිට 27,680 දක්වා පහත බැස ඇති බවයි ඔහු සඳහන් කළේ.
ඒ වනවිට දඬුවම් විඳිමින් සිටි 10,000ක පමණ සංඛ්යාව 9,265 දක්වාත්, රක්ෂිත බන්ධනාගාර ගතව සිටි 20,000කින් දැනට රඳවා සිටින්නේ 18,415ක් පමණ සංඛ්යාවක් බවද ඔහු සඳහන් කළේය.
මේ අතර රක්ෂිත බන්ධනාගාර ගතකොට සිටින රැඳවූවන්ට ඡන්දය පාවිච්චි කිරීමේ හිමිකම ලබාදිය යුතු බවට මතුව තිබූ යෝජනාව ජනාධිපතිවරණයට පෙර මැතිවරණ කොමිසමේද සාකච්ඡාවට භාජනය වූ බව ඔහු පැවැසීය.
එහෙත් ඒ පිළිබඳ මෙතෙක් අවසන් තීරණයක් බන්ධනාගාර දෙපාර්තමේන්තුවට ලැබී නොමැති බවයි ඔහු සඳහන් කළේ.
ප්රේමලාල් විජේරත්න
