අගමැතිවරයා හා සජිත් ප්‍රේමදාස මහත්වරුන් අතර ඊ‌යේ (10) රාත්‍රියේ පැවැතිි සාකච්ජා කිසිදු එකගතාවකින් තොරව අවසන් වී ඇත.
මෙහිදී සජිත්ට පමණක් සාකච්ජා සදහා පැමිණෙන ලෙසට අගමැතිවරයා ආරාධනා කර තිබුණද බලහත්කාරයෙන්ම වාගේ ඊට මලික් සමරවික්‍රම-කබීර් හෂීම් හා හර්ෂ ද සිල්වා පැමිණ ඇති බව දැනගන්නට ඇත. එහිදී හර්ෂ ද සිල්වා තමන් විසින් සකස් කළ සමීක්ෂණ වාර්තාවද රැගෙන පැමිණ තිබේ.
එහිදී අගමැතිවරයා මෙපමණ පිරිසක් කැටුව පැමිණියේ ඇයිද යයන්න පිළිබදව සජිත්ගෙන් විමසද්දී සජිත් ප්‍රකාශ කොට ඇත්තේ ඔවුුුුන් තමන් කැටුව පැමිණියේ නැති බවත්, වෙනම ඔවුන් පැමිණ ඇති බවත්ය.
කෙසේවෙතත් සාකච්ජා ආරම්භයේදීම සජිත් ප්‍රකාශ කොට ඇත්තේ තමන්ට ජනාධිපතිවරණයට ඉදිරිපත් වීමට අවශ්‍ය බවත්, අගමැති ධූරය සහ පක්ෂ නායකත්වය ලබා දීම සම්බන්ධයෙන් තමන්ට ගැටලුවක් නැති බවත්ය.
නමුත් ඊට අගමැතිවරයා කිසිදු යහපත් ප්‍රතිචාරයක් ලබා දී න‌ොමැත. ඒ වෙනුවට අගමැතිවරයා කියා ඇත්තේ තමන්ගේ ඉල්ලීම් මේ ආකාරයට පක්ෂය ඇතුළේ කතා කිරීමට හැකියාව තිබියදී රට පුරා රැස්වීම පවත්වමින්, ලිපිවලට අස්සන් ගනිමින් හැසිරුණු ආකාරය කිසිසේත්ම පිළිගත නොහැකි බවකි. මේ හරහා සජිත් ඇතුළු කණ්ඩායම පක්ෂය දෙකඩ කිරීමට කටයුතු කර ඇති බවද අගමැතිවරයා සදහන් කොට තිබේ.
මීට අමතරව මෙම රැස්වීම අතරවාරයේදී අගමැතිවරයා පළමු වතාවට දෙවරක්ම මලික් සමරවික්‍රම මහතාට දැඩි ලෙස දොස් පැවරීමට කටයුතු කර ඇත. අගමැතිවරයා එහිදී කියා ඇත්තේ මලික් යනු ජාතික ලයිස්තු මන්ත්‍රිවරයකු බව මතක තබා ගන්නා ලෙසත්, ජාතික ලයිස්තු මන්ත්‍රීවරයකුට ජන්දයෙන් පැමිණි රවි කරුණානායක වැනි ජනතා නියෝජිතයකුට චෝදනා නළ නොහැකි බවත්, රවිට ජනතා නියෝජිතයකු වශයෙන් අවශ්‍ය අයකුට චෝදනා කිරීමේ හැකියාවක් පවතින බවත්ය.
ඒ අනුව සාකච්ජාව අවසන් කරමින් අගමැතිවරයා රාජිතට සදහන් කර ඇත්තේ මොවුන් සමග තවදුරටත් සාකච්ජා කරන ලෙසටය. එමෙන්ම පැමිණි පිරිසට අගමැතිවරයා කියා ඇත්තේ ‘මම නම් කිසිම මීටින් එකකට යන්න බය නෑ. තනියම තමයි යන්නේ. රාජිතට වුණත් මම මෙතනට එන්න කිව්වේ ආවේ එයා මධ්‍යස්ථ චරිතයක් නිසයි. ඒ හින්දා ඔයා ම‌ෙහෙම කට්ටිය එක්කරගෙන ආපු එක වැරදියි’ යැයි කියාය.
හරීන්ට සාකච්ජා සාර්ථකලු
කෙසේවෙතත් සාකච්ජාව අවසන් වීමෙන් පසු සජිත් පිල නියෝජනය කරන හරීන් ප්‍රනාන්දු මහතා ට්විටර් පණිවුඩයක් තබමින් සාකච්ජා සාර්ථක බවත්, සති අන්තයේදී සජිත් ජනාධිපති අප‌ේක්ෂකයා ලෙස නම් කරනු ඇති බවත් සදහන් කර තිබීම විශේෂ සිදුවීමකි.
