ශ්රී ලංකාවේ සුන්දරත්වය අතින් ඉදිරියෙන්ම සබරගමු පළාත තිබෙන බව සංචාරක ඔබට රට වටා ඇවිද යන විට හැඟී ඇති බව විශ්වාසය. සැඟවී ඇති සොඳුරු තැන් සේම සිතාගත නොහැකි සුන්දරම දුර්ලභම ස්ථානද දැකිය හැකිය.
තවමත් මිනිස් පහස නොලැබූ සහ සංචාරක ආකර්ෂණය අඩු සුන්දර ස්ථාන සබරගමුවේ ඕනෑ තරම් දැකිය හැකිය. එයින් එක් ස්ථානයක් නම් හුනුගල් පොකුණ හඳුන්වා දිය හැකිය. මෑත කාලයේදී හමු වූ මේ සොඳුරු ඉසව්ව අද වන විට එම පරිසර කලාපයට දරාගත නොහැකි මට්ටමේ සංචාරකයන් පිරිසක් ළඟාවීම හේතුවෙන් එහි සුන්දරත්වයට සහ ආරක්ෂාවටද තර්ජනයක් වෙමින් පවතියි. මෙම හුනුගල් පොකුණ අවට පරිසරයේද හුනුගල් තිබීමත්, දීර්ඝ කාලයක් දිය පහර ඔස්සේ හුනු මිශ්ර ජලය ගලායෑමත් හේතුවෙන් මෙවැනි ස්ථාන සොබාදහමින්ම නිර්මාණය වී ඇත. අවට ඇති උස් වූ මහා දැවැන්ත රුක් නිසාවෙන් මෙහි ඇති සුන්දරත්වය තව තවත් වැඩි වී තිබේ. මෙය අලින්ගේ රජදහනකි. රක්ෂිතයක් තුළ මෙය පිහිටා තිබුණද කිසියම් අදිසි හස්තයක් ක්රියාත්මකවී මේ වන විටද මෙය ආසන්නයේම සංචාරක හෝටලයක් පවා කඩිමුඩියේම ඉදිවෙමින් ඇත. මේ වන විටත් සංචාරකයන් රැගෙන යන බීර ටින්, පොලිතින් මලු සහ බෝතල් වැනි පරිසරයට ඉතා අයහපත් දේ එකතු වෙමින් පවතී. මෙය තහනම් කලාපයක් කර එහි යෑම සීමාකර ආරක්ෂා කළ හැකි තැනක් නොවේ. මන්ද කෙසේ හෝ එහි පිහිටීම සොයායන පිරිස් සිටී. මෙය නැරඹීමට, එහි පහස විඳගත්තද ගැටලුවක් නොවේ. නමුත් එය හදවතින්ම ආරක්ෂා කිරීමට අප බැඳී සිටිය යුතුය. නැතහොත් මෙය තවත් ෆැට්නාවක් හෝ උඩදියලුමක් වනවාට සැක නැත. ගම්වාසීන් ද වක්රව මෙය ප්රචලිත කිරීමට උත්සාහයක් ගන්නා බව පෙනේ. එය නම් ඔවුන්ගේ යටි අරමුණක් ඉෂ්ට කරගැනීමක්ය. එහි යන රථ ඔහුන්ගේ ගෙවතුවල ගාල් කර තබා ආරක්ෂා කිරීමට සුළු මුදලක් අයකරගැනීම, ආහාර ලබාදීම වැනි දේ සුළු වශයෙන් සිදුකිරීමට දැන් දැන්ම පෙලඹී ඇත. ඔබට මේ සොඳුරු ඉසව්ව නැරඹීමට යෑම සඳහා අවස්ථාවක් ලදහොත් ඔබගේ පා සටහන් පමණක් එහි ඉතිර කර මතකයන් පමණක් රැගෙන එන ලෙස ඉතාමත් කරුණාවෙන් ‘ඇවිදිමු ලංකා’ අපද පරිසරයට ආදරය කරන සියලුම දෙනා ඉල්ලා සිටිමු.
ඉදුන් සම්පත් දැරණියගල
