මම හෙමින් ගමනක් ආවේ. ඒ ආපු ගමනේ සතුට දැන් තමයි තියෙන්නේ…
දැන නම් හරිම බයයි…
‘ගෞතම්’ තුළ ‘රෝෂිණී’ද, ‘වසුදා’ තුළ ‘සරණි’ ලෙසින්ද, සුවිශේෂී චරිත නිරූපණය කරමින් ප්රේක්ෂක ආදරය දිනාගත් රෝමා රෝෂි ජයකොඩි දිගු නිහැඬියාවකට පසු නැවැත ‘ඉස්කෝලේ’ ටෙලිනාට්යයේ ‘නන්දනී’ ලෙසින් අපිට දැකගන්නට පුළුවන්. ඉතින් දිගු නිහැඬියාවකට පසු නැවැත රංග චාරිකාවක නිරත වෙමින් කටයුතු කරන ඇගේ අලුත් තොරතුරු ගැන දැන ගන්න හාට් අපි ඇය සමග කතා කළා.
ඉතින් කොහොමද රෝමා?
සතුටින් පවුලේ අයත් සමග ඉන්නවා.
ඒ සතුට එක්ක පුංචි බයකුත් ඇති නේද?
අනේ ඔව්… දැන් ‘කොවිඞ්’ වෛරසය සීග්රයෙන් පැතිරෙන නිසා ගොඩාක් ආරක්ෂාකාරීව තමයි ඉන්නේ.
පැතිරගෙන යන මේ ‘කොවිඞ්’ එක්ක රූපගත කිරීම්වලට යෑමට බයක් නැද්ද?
රූපගත කිරීම්වලට සම්බන්ධ වීමේදී එය ගැන දැඩි කල්පනාවෙන් තමයි යොමුවෙන්නේ. නිර්මාණවලින් ආරාධනා ලැබුණත් මම දැන් ඒ කිසිවක් බාර ගන්නේ නැහැ. මේ ප්රශ්න නිසා. ‘ඉස්කෝලේ’ ටෙලිනාට්යයේ විතරයි මම වැඩ කරන්නේ මේ දවස්වල. ‘ඉස්කෝලේ’ ටෙලිනාට්යයේ නිෂ්පාදන කණ්ඩායම අපිව පුදුම විදියට ආරක්ෂා කරන්නේ. සෞඛ්ය නීති-රීති අනුගමනය කරමින් අපිව ආරක්ෂා කරනවා. ඒ විතරක් නෙවේ කෑම, බීමෙන් පවා නිරෝගී ආහාරපාන පවා අපිට සුරක්ෂිතව, පිරිසුදුව ලබා දෙන එක ගැන මම අගය කරනවා.
කාලෙකට පස්සේ තමයි ඔබ නැවැත රඟපෑමට යොමුවන්නේ නේද?
ඔව්… දරුවන්ගේ වැඩකටයුතුත් එක්ක මම පොඞ්ඩක් නිර්මාණවලින් ඈත්වෙලා හිටියා. දැන්නම් ප්රශ්නයක් නැහැ දුවයි, පුතයි ලොකු නිසා. හැබැයි මම ක්ෂේත්රයෙන් ඈත් වෙලාම හිටියේ නැහැ. හඬකැවීම්, කෙටි නිර්මාණ සඳහා විටෙන් විට පුළුවන් විදියට සම්බන්ධ වුණා.
එදා ඔබේ දැකපු රංගනයට වඩා ‘නන්දනී’ චරිතය තුළින් අපි වෙනසක් දකිනවා?
‘නන්දනී’ චරිතය හරිම ලස්සනට සමන් එදිරිමුණි පෙළගස්වලා තියෙනවා. ඉතින් මම මෙයට පෙර මෙවැනි චරිතයක් කරලා නැති නිසා මටත් ලොකු වෙනසක් දැනුණා. ඒ නිසාම තමයි මම ‘ඉස්කෝලේ’ ටෙලිනාට්යයට සම්බන්ධ වුණේ.
‘නන්දනී’ තුළින් ඔබ කරන නපුරුකම්වලට ප්රේක්ෂකයන් දක්වන ප්රතිචාර කොයි වගේද?
ප්රේක්ෂකයින් විතරක් නෙවේ මගේ දුවයි, පුතයි පවා කියනවා ඇයි ඔච්චර නපුරු වෙන්නේ කියලා. එයාලා අහනවා චරිතය මාරු කරගන්න බැරිද කියලා. හැබැයි ‘නන්දනී’ තරම් මම නපුරු නැහැ.
ඔබ නිර්මාණවල විවිධ චරිත නිරූපණය කළ කලා ශිල්පිනියක් බව අපි දැක්කා. ඉතින් ඔබට මේ විවිධත්වයේ වෙනස දැනුණේ කොහොමද?
ඇත්තටම මම කැමැති චරිතාංග රංගන ශිල්පිනියක් ලෙසට කටයුතු කරන්න. අද ගොඩදෙනෙක් චරිතවල කොටුවෙලා කියලා මමත් දකිනවා. මම ඒ විදියට වැඩ කරන්න කැමැති නැහැ. මම මුදලට වඩා බලන්නේ රටාවක් ලෙසට විවිධ හැඩයේ චරිත නිරූපණය කරන්න තමයි.
ඇවිද්ද පය දහස් වටී කියනවා වගේ ඔබ මේ ආපු ගමන ගැන සතුටු වෙනවාද?
මාව මේ ක්ෂේත්රයට සම්බන්ධ කළේ සුසිලා කූරගම මහත්මිය. ඉතින් මම නිතරම නිර්මාණවල ඉන්න ඕනෑ කියලා අදහස් කළේ නැහැ. මම හෙමින් ගමනක් තමයි ආවේ. ඒ ආපු ගමනේ සතුට තමයි දැන් තියෙන්නේ.
-වසන්ත විතාරණගේ
