මේ දිනවල ස්වාධීන රූපවාහිනියේ “තෝඩු” ටෙලි නාට්‍ය හරහා ඔබ වෙත එන දිනිති මතක ඇති. ඇය හාහා පුරා කියා ටෙලි නාට්‍යයක රඟපාන පළමු අවස්ථාව මෙය වීම විශේෂත්වයක්. ඉතින් දිනිති ලෙසට චරිත මවන්නේ සෙව්වන්දි නයනතාරා. “හාට්” අතිරේකයට පළමු වතාවට කලා දිවියේ වතගොත ගැන දිනිති කතා කළේ මේ විදියටයි.
දිනිති චරිතය ඔබට දැනුණු විදිය ගැන කතා කළොත්?
ඇත්තටම දිනිතිගේ චරිතයෙන් අපගේ ජීවිතයට ගන්නත් ගොඩාක් දේවල් තියෙනවා. එවැනි චරිතයක් මට පළමුවරට කැමරාව ඉදිරියේ රඟපාන්න ලැබීමත් වාසනාවක්. දිනිතිගේ චරිතය මගේ ජීවිතයට සමානකම් තිබෙන අවස්ථා තිබෙන නිසා චරිතය කිරීමට පොඩි පහසුවක් දැනුණා.
අපට ආරංචි වුණේ නම් සෙව්වන්දි කැමරාව ඉදිරියේ හොඳට බය වුණා කියලා?
ටෙලි නාට්‍යයක රඟපාන පළමු අවස්ථාව නිසා බයක් නොතිබුණා නෙවේ. “තෝඩු” ටෙලි නාට්‍යයේ සියලුම දෙනා මට උදව් කළා. ඒ සියලුම දෙනාගෙන් ලැබුණු සහාය නිසා තමයි අදටත් මට මඟතොටදී හොඳ ප්‍රතිචාර ලැබෙන්නේ. හැමෝම මට ආදරය කරනවා. වයස් භේදයකින් තොරව.
මම ඔබට දිනිති කියන්නද? සෙව්වන්දි කියන්නද?
දැන් නම් ඉතින් ගොඩ දෙනෙක් මාව දන්නේ දිනිති කිව්වම තමයි ඉතින්.
සෙව්වන්දිගේ මේ දවස්වල අලුත් වැඩකටයුතු කොහොමද?
මොනවත් කළේ නැහැ. මේ දවස්වල අසනීපවෙලා ගෙදරට වෙලා ඉන්නවා.
සෙව්වන්දිට “තෝඩු” දොර විවර වුණු විදිය ගැන කතා කළොත්?
“තෝඩු” ටෙලි නාට්‍යයේ නිෂ්පාදක ලලිත් වසන්ත මහතා ආරාධනා කළා මෙහෙම චරිතයක් තියෙනවා රඟපාන්න එන්න කියලා. ඒත් මගේ කැමැත්ත තිබුණට ගෙදරින් කැමැත්ත ගන්න කාලයක් ගියා.
පුංචි තිරයේ පළමු පෙම්වතාව අමතක වෙයිද ඉදිරියේදී ඔබට?
ඇත්තටම සූර්යා අයියාගේ දක්‍ෂතා මම නිර්මාණවල දැකලා තිබුණත් මම හිතුවේ නැහැ මගේ පෙම්වතා විදයට සූර්යා අයියා එක්ක රඟපාන්න ලැබෙයි කියලා. ඔහුගෙන් ලොකු සහායක් ලැබුණා මගේ චරිතය ගොඩනඟා ගැනීමට.
පුංචි තිරයේ පෙම් කරන සෙව්වන්දිට සැබෑ ජීවිතයේ පෙම්වතාගෙන් බාධා නැද්ද?
එහෙම කෙනෙක් තවම මට නැහැ. ආදර ඇරයුම් ඕන තරම් එනවා. මම ජනප්‍රිය වෙන්නත් කලින් ආවා. මම ඒ ගැන තවම හිතලා නැහැ කියලා තමයි මට මේ වෙලාවේ කියන්න තියෙන්නේ.
වසන්ත විතාරණගේ
