ඉතාලියේ තනිවුණු ආදරණීය ගායකයා

“මං ඉතාලියේ තනිවුණා” ගීතය ගයන ප්‍රසංග වේදිකාවට නැතුවම බැරි හඬක් තමයි ධනපාල උඩවත්ත කියන්නේ. ඉතින් “මං ඉතාලියේ” ගීතය දැන් ධනපාලගේ පුතා ගයාන් උඩවත්ත වෙනස්ම හඬකින් ගයනවා. ඉතින් මේ වෙනසට හේතුපාදක වුණු ඇත්ත කතාව ගැන දැනගන්න අපි ප්‍රවීණ ගායක ධනපාල උඩවත්තට කතා කළා.
“මං ඉතාලියේ” සින්දුව ඔබේ පුත් ගයාන් උඩවත්ත වෙනස්ම ආරෙකින් ගායනා කරනවා නේද?
ඔව්. මගේ පුතාලා දෙන්නම “මං ඉතාලියේ” ගීතය ගායනා කරනවා. මං ඉතාලියේ සින්දු දෙකම සංගීතවත් කළේ මගේ පුතා ගයාන් උඩවත්ත. මගේ දේවල් මගේ දරුවන්ට. ඉතින් පුතා දැන් ගැළපෙන විදියට ඔහුගේ හඬින් වෙනස්ම විදියට ගායනා කරනවා. දැනට ලක්‍ෂ 12ක් විතර සින්දුව රසවිඳලා තියෙනවා. මම වරක් ඉතාලි ගියා. එහි දැකපු ලස්සන තමයි මම මේ සින්දුවෙන් කියන්නට අදහස් කළේ. අවුරුදු 10ක ළමයෙක්ගේ කටින් පවා පිටවෙන්නේ මං ඉතාලියේ සින්දුව. ඒ තරමට සින්දුව ජනප්‍රිය වුණා. 2014 තමයි “මං ඉතාලියේ” සින්දුව ගායනා කළේ. අද ප්‍රසංග වේදිකාවට නැතුව බැරි සින්දුවක් වෙලා.
වසර පනහක අත්දැකීම් එක්ක ප්‍රසංග වේදිකාවේ ගෙවන ජීවිතය කොයි වගේද?
ප්‍රසංග වේදිකාවට මම සින්දු කියන්න ඇවිත් අවුරුදු 52ක් විතර වෙනවා. දුක් විඳගෙන නොකා නොබී මගේ ගමන අධිෂ්ඨානශීලීව ආවා. අද මම සතුටු වෙනවා. මගේ දරුවොත් මගේ දේවල් ඉදිරියට අරගෙන යන එක ගැන මම සතුටු වෙනවා. ඉතින් තවත් කාලයක් මට ප්‍රසංග වේදිකාවේ සින්දු කියන්න පුළුවන්. මගේ රසික රසිකාවියන් වෙනුවෙන්.
ඔබ තමයි ලංකාවේ පළමු රණවරු ගීතය ගායනා කළේ. එය ගැන කතා කළොත්?
80 දශකයේ තමයි මම “මා ආදරණීය මගේ අම්මා වෙතටයි” ගීතය ගායනා කළේ. ඒ සින්දුව හෙක්ටර් විජේසිරි පද රචනය කළා. සංගීතවත් කළේ ලාල් තේනබන්දු. සම්මාන ලැබෙන්න ගිහිල්ලත් නොලැබී ගියා. හැබැයි ජනතා සම්මානය අදටත් මට තියෙනවා.
ඇයි ඔබ සත්‍ය කතා ඇසුරෙන් ගීත නිර්මාණය කරන්නේ?
රටේ අපරාධයක් වුණාම මම එය ගැන නිර්මාණ කරනවා මිනිසුන්ට දැනෙන්න. ආයේ ඒ දේවල් නොවන විදියට. රිසානාගේ සිද්ධිය මම නිර්මාණය කළා. කුරුණෑගල සේයා දරුවගේ සිද්ධිය නිර්මාණය කළා. හැබැයි මම ඒ දේවල් ඒ කාලේ ගායනා කළාට ප්‍රසංග වේදිකාවේ ගායනා කරන්නේ නැහැ. රටේ මිනිසුන් කම්පාවට පත්කරපු ඛේදවාචක මම ප්‍රසංග වේදිකාවේ කියවලා නටවන්න දෙන්නේ නැහැ.
කාලයක් ඔබ රිදී තිරයේ රඟමින් ගායනා කළා. දැන් සිනමාවේ ආරාධනා නැතිද?
ජීවන්ති, සත්වැනි දවස, චිත්‍රපටවල මම රඟපාමින් ගායනා කළා. හේමසිරි සෙල්ලප්පෙරුම තමයි මට ඒ අවස්ථාව උදාකරලා දුන්නේ. ඉතින් ප්‍රසංග වේදිකාවේ මම ගොඩාක් කාර්යබහුල නිසා මට සිනමාව පැත්තෙන් එයට වඩා යමක් කරන්න බැරි වුණා.
වසන්ත විතාරණගේ