හිටපු ජපාන අගමැති ෂින්සෝ අබේ මහතාගේ රාජ්ය අවමංගල්යය සඳහා බ්රිතාන්යයේ දීර්ඝතම කාලයක් රජකම් කළ දෙවන එලිසබෙත් රැජිනගේ රාජ්ය අවමංගල්යයට වඩා වැඩි මුදලක් වැය විය හැකි බවට ගණන් බලා තිබීමත් සමග ජපන් ජනතාවගෙන් ඊට දැඩි විරෝධයක් එල්ල වෙමින් පවතින බව ජපාන මාධ්ය වාර්තා කොට ඇත.
ගාඩියන් පුවත්පතට අනුව, බදු ගෙවන්නාට වන වියදම සහ පාලක පක්ෂ දේශපාලනඥයින් එක්සත් පල්ලියට ඇති බැඳීම් පිළිබඳ හෙළිදරව් කිරීම් හේතුවෙන් බහුතර ඡන්දදායකයින් එයට විරුද්ධ වන බව මත විමසුම්වලින් පෙන්නුම් කරමින්, උත්සවය අවලංගු කිරීමට රජයට බලපෑම් එල්ල වී තිබේ.
එමෙන්ම ෂින්සෝ අබේගේ රාජ්ය අවමංගල්යය හෙට (27) පැවැත්වීමට නියමිත අතර එය මිල අධික උත්සවයක් වනු ඇති බවට මාධ්ය වාර්තා පළවීම හේතුවෙන් ජපානයේ රජයේ බලධාරීන් දැඩි විවේචනයට ලක්ව ඇත.
ඊට විරෝධය පළ කරමින්, මෙම සතිය මුලදී, ෂින්සෝ අබේ වෙනුවෙන් රාජ්ය අවමංගල්යයක් පැවැත්වීමට සැලසුම් කිරීමට විරුද්ධ වෙමින්, ජපාන අගමැති ෆුමියෝ කිෂිඩාගේ කාර්යාලය අසල පුද්ගලයෙකු ගිනි තබා ගත්තේය.
උත්සවය අවලංගු කරන ලෙස ඉල්ලා සිවිල් කණ්ඩායම් අත්සන් 400,000 ක පෙත්සමක් ද ඉදිරිපත් කළ අතර, පසුගිය සතියේ ඇස්තමේන්තුගත 4,000 ක පිරිසක් පාර්ලිමේන්තුවෙන් පිටත උත්සවයට එරෙහිව උද්ඝෝෂණ කළහ.
අබේගේ අවමංගල්ය කටයුතු සඳහා ජපන් යෙන් බිලියන 1.66ක් වැය වන අතර, දෙවන එලිසබෙත් රැජිනගේ අවමංගල්ය කටයුතු සඳහා යෙන් බිලියන 1.3ක් පමණ වැය වූ බව වාර්තා විය.
ගාඩියන් හි වාර්තාව සඳහන් කළේ ජපාන රජය මුලින් රාජ්ය අවමංගල්ය කටයුතු සඳහා ඇස්තමේන්තුගත වියදම යෙන් මිලියන 250 ක් ලෙස ගණන් බලා ඇති බවයි. ප්රධාන කැබිනට් ලේකම් Hirokazu Matsuno පවසා ඇත්තේ උත්සවයේ පොලිස් කටයුතු සඳහා යෙන් මිලියන 800 ක් පමණ වැය කිරීමට ඇස්තමේන්තු කර ඇති අතර ප්රභූන්ට සත්කාර කිරීම සඳහා යෙන් මිලියන 600 ක් වැය වනු ඇතැයි අපේක්ෂා කරන බවයි.
රාජ්ය අවමංගල්ය කටයුතු සඳහා බිල යෙන් බිලියන 1.7 දක්වා ළඟා විය හැකි බව ඔහු වැඩිදුරටත් පවසා තිබුණි.
ටෝකියෝ හි නිපොන් බුඩෝකන් ශාලාවේ පැවැත්වෙන උත්සවයට බැරැක් ඔබාමා, කමලා හැරිස් සහ එමානුවෙල් මැක්රොන් සහ ඉන්දීය අගමැති නරේන්ද්ර මෝදි ඇතුළු අමුත්තන් 6,000කට වැඩි පිරිසක් සහභාගී වනු ඇතැයි සංවිධායකයින් අපේක්ෂා කරන බව කියෝඩෝ ප්රවෘත්ති ඒජන්සිය පවසයි.
