පසුගිය සදුදා පැවැති ජනාධිපති ගෝඨාභය රාජපක්ෂ මහතා සහභාගී නොවුණු කැබිනට් මණ්ඩල රැස්වීමේදී ඇමැතිවරුන් රැසක්ම ජනාධිපති ලේකම් ආචාර්ය පී.බී. ජයසුන්දර මහතා එම තනතුරින් ඉවත් කරන ලෙස අදහස් ප්රකාශ කොට ඇති බව වාර්තා වේ.
ජනාධිපතිවරයා විදෙස්ගතව සිටීම හේතුවෙන් අගමැති මහින්ද රාජපක්ෂ මහතාගේ ප්රධානත්වයෙන් මෙම කැබිනට් රැස්වීම පැවැත්වී තිබිණ.
කෙසේවෙතත් මීට පෙර ජනාධිපතිවරයා සහභාගීව සිටි කිසිදු කැබිනට් මණ්ඩල රැස්වීමකදී කිසිදු ඇමැතිවරයෙක් ජනාධිපති ලේකම් පීබී ජයසුන්දර මහතා සම්බන්ධයෙන් කිසිදු පැමිණිල්ලක් ඉදිරිපත් කර තිබුණේ නැත.
නමුත් අගමැති මහින්ද රාජපක්ෂ මහතා පී.බී. ජයසුන්දර මහතා සමග එතරම් ඇයිහොදැයියක් නොමැති බව දන්නා ඇමැතිවරුන් රැසක්ම ජනාධිපතිවරයා නොමැති අවස්ථාවේදී අගමැතිවරයාට පී.බී ජයසුන්දර මහතා සම්බන්ධයෙන් පැමිණිලි කිරීමට කටයුතු කිරීම විශේෂ සිදුවීමකි.
