මෙරට ජනගහනයෙන් සියයට 70ක් තවමත් ආහාර පිසීමේ කටයුතුවලදී දර භාවිත කරන බවද, වසරකදී මෙරට දර ටොන් කෝටියක් පරිහරණය වන බවද සුනිත්ය බලශක්ති අධිකාරියේ හිටපු අධ්යක්ෂ, ඒකාබද්ධ සංවර්ධන සංගමයේ (IDEA) විධායක අධ්යක්ෂ ආර්.එම්. අමරසේකර පැවසීය. (Sri Lanka Latest News)
තිරසර සංවර්ධන අරමුණු සාක්ෂාත් කරගැනීම සඳහා විමධ්යගත පුනර්ජනනීය බලශක්ති දායකත්වය සම්බන්ධයෙන් මාධ්යවේදීන් දැනුවත් කිරීමට කොළඹ 07, ජේ.ආර්. ජයවර්ධන මධ්යස්ථාන ශ්රවණාගාරයේදී පැවැති වැඩමුළුවකදී ඔහු මේ බව පැවසුවේය.
මෙම වැඩමුළුව ඒකාබද්ධ සංවර්ධන සංගමය (IDEA) සහ සුනිත්ය බලශක්ති අධිකාරිය විසින් පවත්වන ලදී.
ලංකාව බලශක්තියෙන් දුප්පත් රටක් නොවන බවද, තෙල් හා ගෑස්වලට මෙන් දර සඳහා විදේශ විනිමයක් වැය නොවන බවද, දර පුනර්ජනනීය කළ හැකි නිසා එය ක්ෂය වන සම්පතක්ද නොවන බව ද විධායක අධ්යක්ෂවරයා කීවේය.
මුළුතැන්ගෙයි දර දුම් වායු දූෂණය ආශ්රිතව ඇතිවන රෝගාබාධ නිසා වසරකට ලෝකයේ කාන්තාවන් හා ළමුන් මිලියන දෙකක් පමණ මියයන බව ලෝක සෞඛ්ය සංවිධානය විසින් අනාවරණය කර ඇත. දර පරිහරණය නිසා ඇතිවන අහිතකර බලපෑම් අවම කර ගැනීමට වැඩි දියුණු කරන ලද දර උඳුන් භාවිතය ඉතා වැදගත් බවද, පාරම්පරික දර උඳුන භාවිතය මගින් එක් පුද්ගලයකු දිනකට දර කිලෝ ග්රෑම් 1.65 ක් භාවිතා කිරීමට අවශ්ය වූවද, වැඩි දියුණු කරන ලද දර උඳුන් සඳහා දර වැයවන්නේ ග්රෑම් 820 ක පමණ ප්රමාණයක් බවද විධායක අධ්යක්ෂවරයා පැවසුවේය.
දර භාවිතය නිසා කැලෑ එළිනොවන බවද, කැලෑ එළි පෙහෙළි වන්නේ සංවර්ධන ක්රියාවලිය නිසා බවද ඔහු කීවේය.
aruna
