හිටපු ජනාධිපති ගෝඨාභය රාජපක්ෂ මහතා හට ආණ්ඩුව විසින් ඉකුත් සතියේදී නව නිල නිවෙසක යතුරු භාරදී ඇති බව දැනගන්නට තිබේ.
මෙසේ හිටපු ජනාධිපතිවරයාට ලබාදී ඇත්තේ මහින්ද රාජපක්ෂ මහතා තමන්ට අයත් විජේරාමයේ පිහිටි නිල නිවෙස ප්‍රතිසංස්කරණය කරන තෙක් රැඳී සිටි බුලර්ස් පාරේ පිහිටි නිල නිවෙසක් බව වාර්තා වේ.
මීට පෙර ගෝඨාභය රාජපක්ෂ මහතාට බෞද්ධාලෝක මාවතේ පිහිටි සුවිසල් නිල නිවෙසක් ලබාදීමට ආණ්ඩුව පියවර ගෙන තිබුණද, එම පරිසරයේ ඇති ඝෝෂාකාරී බව හේතුවෙන් තමන්ට වෙනත් නිවෙසක් ලබාදෙන ලෙස හිටපු ජනාධිපතිවරයා අවස්ථා ගණනාවකදීම ආණ්ඩුවෙන් ඉල්ලා තිබිණි.
එම ඉල්ලීම ඉටු නොවූ තැන හිටපු ජනාධිපතිවරයා නුගේගොඩ මිරිහාන ප්‍රදේශයේ පිහිටි තම පෞද්ගලික නිවෙසේ පදිංචියට යෑමටද කටයුතු කොට තිබිණි.
නමුත් මේ වන විට නව නිල නිවෙසක් හිටපු ජනාධිපතිවරයාට ලබාදීමට පියවර ගැනීමත් සමග ඊට අවශ්‍ය ගෘහ භාණ්ඩ මිලට ගැනීමේ කටයුතු සිදුකෙරෙමින් පවතින බවක් දැනගන්නට ඇත.
