හොඳට නරකට දෙකටම රවිමද

සූර්යා හෙවත් රවි ඇතුළු ග්‍රහයන් ඒ ඒ රාශිවල ගමන් කරන විට එහි පලාපල උදාවේ. ඒ අනුව රවි රාශි 12 ගමන් කරන විට මෙසේ පලාපල උදාවේ.
රවි ලග්නයේ ගමන් කරන විට
උද්‍යෝගිමත් ක්‍රියාශීලී අයකු වේ. අන්‍යයන්ට වඩා ප්‍රකට වන අතර පාලන ශක්තිය ලැබේ. හිසේ, මොළයේ උෂ්ණාධික රෝග ඇතිවේ. බලවත්ව සිටීමෙන් ආඩම්බර ගතිය ඇතිවේ.
රවි දෙවැන්නේ ගමන් කරන විට
හදිසි ධන ලාභ ඇතිවේ. ඇස්වල ආබාධ ඇති වීමටත් හදිසි ධන හානි වීමටත් හේතු ව්නේ රවි නීචව සතුරු වැනි අසුබ රාශීන් වූ විටය. වචනය වේගවත් වීමට පුළුවන.
රවි (3) තුන්වැන්නේ ගමන් කරන විට
මෙම කාලය තුළ කරන කියන කටයුතු සාර්ථක වේ. සහෝදරයන් වෙනුවෙන් යමක් කිරීමට සිදුවේ. ග්‍රන්ථකරණයට හොඳ කාලයකි. බලවත්ව සිටීමෙන් කරන කියන කටයුතු සාර්ථක වන කාලයකි.
රවි (4) හතරවැන්නේ ගමන් කරන විට
ඥාතීන්ගේ විරෝධය ඇති වුවද නිවාස, දේපොළ ලැබීමටද හේතුවේ. පපුවේ හදිසි රෝග ඇතිවීමටත් උෂ්ණත්වය වැඩි වීමටත් හේතුවේ. දැඩි තීරණ ගන්නා කාලයකි.
රවි (5) පස්වැන්නේ ගමන් කරන විට
මේ කාලය තුළ ශරීරය කෙට්ටු වන අතර දරුවන් ලැබීමටත් හේතුවේ. අසුබ සිටීමෙන් දරුවන්ට අසුබ වන අතර සියලු අධ්‍යාපන කටයුතු සාර්ථක වීමට පුළුවන.
රවි (6) වැන්නේ ගමන් කරන විට
සතුරන් පරාජය කළ හැකිය. ශරීරය පෘෂ්ටිමත් වේ. නඩු හබ ඇත්නම් ඒවායින් ජයග්‍රහණය ලබාදේ. සතුරන් බොහෝ ඇති වුවද ඒවා යටපත් කිරීමේ හැකියාව බලවත්ව සිටීමෙන් ලැබේ.
රවි (7) වැන්නේ ගමන් කරන විට
හවුල් ව්‍යාපාරවලින් පාඩු ඇතිවීමටත් තම සහකරු හෝ සහකාරිය සමග ගැටුම් ඇති වීමටත් හේතුවේ. මුත්‍රා හෝ ලිංගික රෝග ඇතිවීමට පුළුවන.
රවි (8) වැන්නේ ගමන් කරන විට
විදුලියෙන්, ගින්දරින් අනතුරු වීමටත්, තුනටියේ හෝ ගුද මාර්ගයේ රෝග ඇතිවීමට හේතුවේ. මෙම කාලය තුළ පියාට අපලයි. නීතිමය ගැටලු ඇතිවීමට පුළුවන.
රවි (9) වැන්නේ ගමන් කරන විට
විදේශ ගමන් යෙදේ. පුණ්‍ය කටයුතුවලට හා බණ භාවනා කටයුතුවලට යොමු කරන කාලයකි. විභාග ආදියෙන් සමත්වන කාලයකි. පියාගේ අදහස්වලට ගරු නොකළත් පියාගේ ආදරය ලැබේ. තම පවුලේ අනෙක් අයට වඩා ප්‍රකටව පෙනේ.
රවි (10) ගමන් කරන විට
කීර්ති ප්‍රශංසා නම්බු නාම ලැබේ. රැකියා අයැදුම්කරුවන්ට රැකියාවන් ලැබෙන කාලයකි. උච්ඡම මිත්‍රම ග්‍රහයන්ට පෙනී සිටියොත් මෙම කාලය ඉතා උසස් ප්‍රතිඵල ලැබේ.
රවි (11) වැන්නේ ගමන් කරන විට
මිත්‍රයන්ගේ උදව් උපකාර හා තනතුරු උසස් වීම් ලැබෙන කාලයකි. ව්‍යාපාරයන්ගේ ධනය ලැබෙන අතර දියුණුවට අඩිතාලම වැටෙන කාලයකි.
රවි (12) වැන්නේ ගමන් කරන විට
නිෂ්ඵල ගමන් බමන් හා අධික වියදම්ද නඩුවලට ලක්වන කාලයකි. විදේශ ගමන් යෙදෙන අතර ගමෙන් පිට වාසය කිරීමට කරුණු යෙදේ. ඇස්වල ආබාධ ඇති වීමටත් බන්ධනාගාරගත වීමටත් හේතු යෙදේ.
කරුණු මෙසේ වුවද උත්පත්තියේදී රවි සිටි ස්ථානයක් උච්ච මිත්‍ර හා බල දුබලතා අනුව මෙම පලාපල වෙනස් වීමට හේතු යෙදෙන බව සලකන්න.
ජ්‍යොතිෂවේදී හස්ත රේඛා විශේෂඥ නන්දසේන වීරසිංහ
අලව්ව
0776586632