ලග්න රැසකට සුබඵල

ග්‍රහ ලොව සෙන්පති හෙවත් චණ්ඩියා, නැතහොත් සහෝදර කාරක, පුරුෂ කාරක ලෙයට අධිපති කුජ හෙවත් අඟහරු ග්‍රහයා එළඹෙන 2019 අගොස්තු 09 වැනි සිකුරාදා දින පාන්දර 04.47ට මෙතෙක් ගමන්ගත් සිය නීච දුබල රාශිය වූ සඳු හිමි කටක රාශියෙන් මිදී සිය මිතුරු රාශියක් වූ රවි හිමි සිංහ රාශියට පිවිසෙයි.
එම කුජ ග්‍රහ තාරකාව එතැනි සිට 2019 සැප්තැම්බර් මස 25 වැනිදා දක්වාම සිංහ රාශියේ මෙම ග්‍රහ චලිතය පවත්වා ගැනීමත්, රවි සමඟින් යෝග වීමත් අනුව මෙම ග්‍රහ ලොව බලවතාගේ සිංහ හා රාශිගත ග්‍රහ චලිතය මත සලකා බැලීමේදී පොදු වශයෙන් මෙම මාස 2කට ආසන්න කාලයේදී මේෂ, සිංහ, කන්‍යා, වෘශ්චික හා ධනු යන ලග්නවලට සුබඵල උදා වන අතර, ඔවුන්ගේ බොහෝ සිතුම් – පැතුම් ඉටුවනු ඇත. වෘෂභ, මිථුන, කටක, තුලා, මකර, කුම්භ හා මීන යන ලග්නවලට තරමක් අසුබ ඵලද උදාවනු ඇත.
අප රට දෙස අවධානය යොමු කිරීමේදී මෙම කාලය තුළ රටේ ආරක්ෂක අංශවල ප්‍රමුඛ වර්ධනයක් දක්නට ලැබෙනු ඇත. ඉදිරි මාස 2ක කාලය තුළ ඛණිජ තෙල්වල මිල ගණන් වැඩි වීමට බොහෝ දුරට හේතු වනු ඇත. රත්රන් හා මිනිරන් ආශ්‍රිත නිෂ්පාදනවල කැපීපෙනෙන වර්ධනයක් ඇති වෙයි. අධ්‍යාපන ආයතන හා එම ක්‍ෂේත්‍රයන් තුළ නොසන්සුන්තා යම් පමණකට ඇති වෙයි. එසේම මෙම කාලය තුළ රටට අලුත් ආරංචි ලැබෙන කාලසීමාවක් වනු ඇත. දේශපාලන කරළිය තුළ පුවත් මැවෙන කාල සීමාවකි. රටේ ආර්ථිකය වර්ධනය වන කාල සීමාවක් වනු ඇත. විපක්ෂයට වාසිදායක වන අතර, විපක්ෂය බලවත් වනු ඇත. පාර්ලිමේන්තුව තුළ වාද – විවාද අරභයා උණුසුම් බවක් දක්නට ලැබෙනු ඇත. අපේ රටට හිමි විදෙස් සහයෝගය පිළිබඳ ගැටලු ඇති වන කාලයකි. කර්මාන්ත ශාලා ආශ්‍රිතව ගිනිගැනීම් වැනි නොයෙකුත් පීඩාකාරී තත්ත්වයන්ද ඇතිවීමේ ප්‍රවණතාවක් මෙම ග්‍රහ මාරු ආශ්‍රිතව පවතිනු ඇත. රට තුළ දේශගුණ විපර්යාස හා නායයෑම් හා ගංවතුර මෙන්ම නියඟ තත්ත්වයන්ද ඇති වීමේ අවස්ථාවන් උදාවීමට හේතු වනු ඇත.
මේෂ ලග්නය
හදිසි ගමන් – බිමන් යෑමට නිතර අවස්ථාව සැලසෙන අතර, වන්දනා ගමන් හා දුර ගමන්ද යෙදීමට ඉඩ ඇත. එසේම ඔබ නොබියව ඉදිරියට යන කාලසීමාවකි. ඔබට මෙම කාලය මිශ්‍ර ඵලදායකවෙයි. බිරිය හෝ සැමියා නිසා ධනයක් හිමිවීමට හැකිය. ආගම දහමට සිත යොමු වෙයි. ලොතරැයි ජය ලැබීමේ වාසනාවක් හිමියි. විවිධාකාරයේ ගිවිසුම්වලට එළඹීමේ අවස්ථාවද මෙම කාල සීමාව තුළ උදාවනු ඇත.
වෘෂභ ලග්නය
ඈත පළාත්වලට යෑමට සිදුවන අතර, නිකරුණේ ගමන් – බිමන් යෙදෙනු ඇත. විවිධාකාරයේ නරක චෝදනා එල්ල විය හැකිය. ගුණධර්ම හීන වන කාලයකි. මෙම කාලයේ නෑයෙක් හෝ හිතවතුන් සමඟ අමනාප වීමට ඉඩ ඇත. බලාපොරොත්තු වූ ණයක් ලැබෙයි. කාර්යබහුල කාලයකි. සහෝදරයන්ට අසුබ වෙයි. කෙටි ගමන්-බිමන් නම් අධික වෙයි. විමසිලිමත් වීම වැදගත්. අනතුරුවලට ලක්විය හැකියි. සහෝදරයන්ට අසුබ වෙයි.
මිථුන ලග්නය
අලුතින් නිවාස ඉදිකිරීමට හා දේපොළ මිලදී ගැනීමට මෙම කාලය සුබයි. දරුවන්ගේ ප්‍රශ්න හා ඒ සම්බන්ධ කටයුතුවලදී දැඩි අර්බුදකාරී තත්ත්ව ඇති වනු ඇත. තරග විභාගවලින් ජය හිමිවන කාලයකි. නඩුහබවලින් ජය ගත හැකිය. පපුවේ සෙම් අමාරු හා ලේ සම්බන්ධ රෝගාබාධ ඇතිවිය හැකිය. මංගල කටයුතු සඳහා මෙම කාල සීමාව යම් පමණක යහපත් කාලයකි.
කටක ලග්නය
ඔබගේ පවුලේ හෝ හිතවතකුට ඇතිවන අසනීප තත්ත්වයන් නිසා ඔබට බොහෝ කාලය, ශ්‍රමය, ධනය ඒ වෙනුවෙන් ගතකිරීමට සිදුවනු ඇත. පසුගිය දිනවල පැවති බාධා යම් පමණකට ඉවත් වෙයි. තනතුරු ලාභ ලැබෙයි. උසස් අධ්‍යාපන කටයුතු සාර්ථක වන අතර, අලුතින් අරඹන කටයුතු නම් මේ කාලයේ අසාර්ථක වෙයි. එසේම මේ කාලසීමාව තුළ ශරීර සෞඛ්‍ය පිරිහීමට හැකියාව පවතිනවා. සිතේ ඇති වන අසහනය දුරු වෙයි. දරුවන්ගේ දියුණුවට කටයුතු යෙදේ.
සිංහ ලග්නය
සතුරු කරදරයකින් ජයගත හැකිය. බලාපොරොත්තු වූ ණය මුදලක් ලැබීමට හැකිය. මුත්‍රා අමාරු හෝ සෙම් රෝග ඇති වීමට ඉඩ ඇත. ඔබට මෙම කාලය මිශ්‍ර ඵලදායක වෙයි. අසනීපවලින් යම් සුවයක් ඇත්වෙයි. ගෘහ ජීවිතය තුළ වැය පක්ෂය ඉහළ යනු ඇත. එදිනෙදා කටයුතුවලදී යම් ආවේගශීලී තත්ත්වයක් දක්නට ලැබේ. උසස් කෙනකු හෝ අසල්වාසීන් සමඟ අමනාප වීමට ඉඩ ඇත. දරුවන්ගේ කටයුතු වර්ධනය වන අතර, රැකියාවේ ඉදිරි ගමනට යම් යම් බාධා ඇති විය හැකිය.
කන්‍යා ලග්නය
මහන්සියේ තරමට ප්‍රතිඵල නැති විය හැකිය. ඥාතීන් සමඟ මතභේදවලට හේතු වනු ඇත. පිරිමි දරු ලාභ ඇති වන අතර, යම් යම් අංශවලින් සාමාන්‍ය සුබයි. ඔබගේ අධ්‍යාපනයට ඉතාම හොඳයි. ඒ වගේම රැකියා ස්ථානයෙන් උසස් වීමක්ද හිමිවීමට ඉඩ තිබෙනවා. ආගමට, දහමට නැඹුරු වන කාලයකි. සමාජයේ පිළිගැනීම ඇති වන අතර, ඔබට අසල්වැසියන්ගෙන් නම් පොඩි පොඩි බාධාද ඇති විය හැකියි.
තුලා ලග්නය
ධන හානි ඇති වන කාලයකි. මුහුණේ රෝගාබාධ ඇති වනු ඇත. අලුතින් නිවාස ඉදිකිරීමට හා දේපොළ මිලදී ගැනීමටත් මෙම කාලය අසුබයි. විදේශ ගමන්වලට එක්විය නොහැකිය. යම් පමණක පවුල් ජීවිතය තුළ ගැටුම් ඇති වන අතර, තම සහකාරියගෙන් හෝ සහකරුගෙන් ධනය ලැබීමටද හැකිය. නමුත් එයින් ප්‍රබල ගැටලු මතුවනු ඇත. සෞඛ්‍ය තත්ත්වය අයහපත්ය.
වෘශ්චික ලග්නය
තනතුරු ලාභ හා උසස්වීම් හිමිය. ගෘහ ජීවිතය මධ්‍යස්ථව ගතවෙයි. වෙනදාට වඩා වෙහෙස වී වැඩ කිරීමට සිදුවෙයි. මෙතෙක් කාලයක් අඩාලව පැවති යම් යම් කාරණා ඉටුවන කාලයකි. විවාහ බාධා ඇති වීමට ඉඩ ඇත. සහෝදරයකුට අපලතාවක් පෙනේ. ලැබීම් අඩාල වන කාලයකි. දේශපාලනයේ නිරත අයට සුබදායක වනු ඇත. ඔබගේ ජනප්‍රියතාව ඉහළ යන කාලයකි. අලුතින් නිවාස ඉදිකිරීමට හා දේපොළ මිලදී ගැනීමටත් මෙම කාලයේදී සිත යොමු වෙයි.
ධනු ලග්නය
හදිසි ගමන්-බිමන් යෑමට නිතර අවස්ථාව සැලසෙන අතර, වන්දනා ගමන් හා දුර ගමන්ද යෙදීමට ඉඩ ඇත. ඇස්වහ, කටවහ දෝෂ හටගැනීමේ ප්‍රවණතාවක් ඇත. රෙදිපිළි හා වස්තු ලාභ ලැබෙන කාලයකි. ශරීරයේ අලංකාරයට අවශ්‍ය දේ මිලදී ගැනීමට අවස්ථාව නොලැබෙන අතර, මෙම කාලයේදී ප්‍රණීත රසමුසු ආහාරද එතරම් නොලැබීමේ හැකියාව පවතී. නමුත් ඔබට ලොතරැයි වාසනාව හිමිය.
මකර ලග්නය
සේවක ගැටලු හා ගෘහ නිර්මාණයකට සම්බන්ධව ගැටලු පැනනැඟීමට හැකිය. වා, පිත්, සම්බන්ධ රෝගාබාධ හටගැනීමට අවස්ථා ඇත. ස්වයං රැකියාවල නිරතවන්නන්ට සුබදායකය. රෝගවලට හරියට ප්‍රතිකාර නොගත්තොත් ඒවායේ සුවය ප්‍රමාද වනු ඇත. ගෘහ ජීවිතය සතුටුදායකය. රැකියාවේ උසස්වීම් වගේම වෙනස්වීම්ද බලාපොරොත්තු විය හැකිය. නීතියට එරෙහිව කටයුතු කිරීම නිසා මුදල් හෝ රැකියාවේ පාඩු සිදු විය හැකිය.
කුම්භ ලග්නය
ඔබට මෙම කාලය මිශ්‍ර ඵලදායක වෙයි. ධනය අතින් යහපත්ය. උසස් අධ්‍යාපන අවස්ථා උදාවෙයි. ව්‍යාපාර අංශවලට සුබදායක වෙයි. රැකියා අංශ තුළ කලකිරීම් ඇති වන අතර, හදිසි වෙනස්වීම්වලට හේතු වෙයි. සෞඛ්‍ය අතින් දණහිස සම්බන්ධ ආබාධ ඇති විය හැකිය. ගේ-දොර කටයුතු සම්බන්ධයෙන් දැඩි කැපකිරීම් කළයුතු වෙයි. රැකියාවේ උසස්වීම් බලාපොරොත්තු විය හැකිය. පවුල් ජීවිතය යහපත් වන අතර, ආදායම් තත්ත්වය ඉහළ යනු ඇත.
මීන ලග්නය
ඇස් රෝග හා මුත්‍රා අමාරු ඇතිවිය හැකිය. මේ කාලයේදී තම ශරීර සෞඛ්‍යය ගැන විමසිලිමත් වීම වැදගත්. විශේෂයෙන් අහුවෙන්නේ නැති ලෙඩ හැදෙන්න පුළුවන්. ඒ නිසා සුබ වගේම අසුබ ඵලත් ලැබෙනවා. මේ කාලසීමාව තුළ ශරීර සෞඛ්‍ය පිරිහීමට හැකියාව පවතිනවා. නමුත් ආදායම් තත්ත්වය යම් ප්‍රමාණයකට වර්ධනය වේවි. සමාජ සේවා පොදු කටයුතුවලින් ගෞරවය හා පිළිගැනීම ඔබට ලැබේවි. පරම්පරාගත දේපොළ වාසි හිමිවෙයි.
සැ.යු. :
ඉහත සඳහන් පලාපල තත්ත්වයන් ඔබේ ජන්ම පත්‍රයේ ග්‍රහ පිහිටීම්, ගතවන මහ දශා හා අතුරු දශා, ග්‍රහයන් උත්පත්තියේදී පිහිටි නැකැත් හා 22 දෙර්කාණාධිපති, 64 නවාංශකාධිපතිගේ තත්ත්වයන් හා විවිධ ග්‍රහ දුෂ්ටි මත යම් පමණක අඩුවැඩි වීම සිදුවිය හැකිය.
ජ්‍යොතිෂවේදී, බණ්ඩාරගම, සම්පත් එස්. කල්පගේ