කුජ මාරු වුණා ඊළගට මොකද වෙන්නේ?

ග්‍රහ ලොව සෙන්පති ලෙස සලකනු ලබන කුජ ග්‍රහයා 2019 අගෝස්තු 09 සිකුරාදාට එළිවන පාන්දර 04.47ට ග්‍රහ ලොව රජු ලෙස සලකනු ලබන රවිට අයත් සිංහ රාශියට ඇතුළු විය. කුජ සිංහ රාශිය තුළ 2019 සැප්තැම්බර් 25 දිනට එළිවන පාන්දර 06.31 දක්වා දින 47කට ආසන්න කාලයක් ගමන් ගනී. සිංහ රාශිය හරහා ගමනේදී මා, පුවපල් නැකැත් සීමාවන් සම්පූර්ණයෙනුත් උත්‍රපල් නැකතේ ප්‍රථම පාදයත්, කුජ පසු කරයි. කුජ, සිංහ රාශිය තුළදී මිත්‍ර තත්ත්වයක් ලබාගනී.
කුජ ග්‍රහයා සිංහ රාශිය තුළ ගමන් ගන්නා කාලය තුළදී ශ්‍රී ලංකාව තුළ විශාල ගිනිගැනීමකින් වටිනා දේපොළ හානි වීමටත්, වසංගත රෝගයක් පැතිරීමේ අවදානමකුත් පවතී. එසේම ඒ ඒ ලග්න හිමියන්ට මෙම කුජගේ ගමන සලකා බැලීමේදී ප්‍රතිඵල ලැබෙන්නේ මේ ආකාරයටයි.
මේෂ ලග්න හිමියන්ට පස්වැනි භාවයේ කුජගේ ගමන නොයෙකුත් අසනීප ඇතිවීමටත්, විරුද්ධකරුවන්ගෙන් කරදර බාධක ඇතිවීමටත් දරුවන්ගේ කටයුතු වෙනුවෙන් වෙනදාට වඩා වෙහෙසීමටත් සිදුවේ.
වෘෂභ ලග්න හිමියන්ට කුජ ග්‍රහයාගේ හතර වැන භාවය හරහා ගමන් ගැනීම නිසා ඥාතීන්ට සහ පවුලේ අයට නොයෙකුත් දුක් කරදර ඇතිවීමටත් ගෙදරදොර අගහිඟකම් ඇතිවීම් ආදියටත් මුහුණදීමට සිදුවේ.
මිථුන ලග්න හිමියන්ගේ තුන්වැනි භාවයේ කුජ ග්‍රහයාගේ ගමන ධන ලාභ ලැබීමටත්, අලුත් මිතුරන් ඇසුරට ලැබීමත් සතුටින් කාලය ගතකිරීමටත් හැකිවේ.
කටක ලග්න හිමියන්ට කුජ ග්‍රහයාගේ දෙවැනි භාවය හරහා ගමන් ගනී. අධික වියදම් ඇතිවී තැන්පත් ධනයේ අඩුවීමක් පෙන්නුම් කරයි. ධන හානියක්ද මේ කාලය තුළදී ඇතිවේ.
සිංහ ලග්න හිමියන්ගේ ලග්න භාවය හරහාම කුජ ග්‍රහයා ගමන් කිරීම වරින්වර කරදර ඇතිවීමටත් වැඩකටයුතු අතපසු වීමටත් වාහනවල කාර්මික දෝෂ ඇතිවීමටත් හේතුවේ.
කන්‍යා ලග්න හිමියන්ට මේ කාලය තුළදී ගින්නෙන් පාඩුවක් සිදුවීමට ඉඩ ඇත. නිශ්ඵල ලෙස මුදල් වියදම් කිරීමටත් අවුල් වියවුල්වලට මුහුණපාන්නටත් සිදුවේ.
තුලා ලග්න හිමියන්ගේ 11 වැනි භාවය හරහා කුජ ග්‍රහයාගේ ගමන තමන්ගේ තත්ත්වය උසස් වීමටත් ආදායම් තත්ත්වය යහපත් වීමටත් ගෞරව සැලකිලි ලැබීමටත් හේතුවේ.
වෘශ්චික ලග්න හිමියන්ගේ දහවැනි භාවයේ කුජගේ ගමන නොයෙකුත් සිත් වේදනා ඇතිවීමටත් වැඩිහිටියකුට සිදුවන විපතක් වෙනුවෙන් වෙහෙසීමටත් සිදුවේ.
ධනු ලග්න හිමියන්ට කුජ ග්‍රහයාගේ නව වැන්න හරහා ගමන් ගැනීම මුදල් අගහිඟකම් ඇතිවීමටත් ශරීර සෞඛ්‍යය දුර්වල වීමටත් හේතුවේ.
මකර ලග්න හිමියන්ට කුජ අටවැන්නේ ගමන් කිරීම සතුරු පීඩා ඇතිවීමටත් ශරීරයට තුවාල සිදුවීමටත් රෝහල්ගතව ප්‍රතිකාර ගැනීමටත් සිදුවිය හැක.
කුම්භ ලග්න හිමියන්ට හත්වැනි භාවය හරහා කුජගේ ගමන විවාහකයාට නොයෙකුත් අසනීප ඇතිවීමටත් අඹු සැමියන් අතර මතභේද ඇතිවීමටත් හේතුවිය හැකිය.
මීන ලග්න හිමියන්ට කුජ ග්‍රහයා හය වැන්න හරහා ගමන් කිරීම මෙතෙක් පැවැති බාධක ඉවත්වී දියුණුවට මගපෑදීමකි. ධන ලාභ ලැබී තමන්ට අවශ්‍ය භාණ්ඩ මිලදී ගැනීමට අවස්ථාව උදාවේ.
අගලවත්තේ චන්දන වීරක්කොඩි
0775489695