එදානම් පුදුම බයක් දැනුණේ…
වීදි නාට්යය කණ්ඩායමෙන් කලා ක්ෂේත්රයට පැමිණි නවක ශිල්පීන් අපිට මේ ක්ෂේත්රයේ දකින්නට, අහන්නට ලැබෙන්නේ කීයෙන් කීදෙනාද? වීදියෙන් තම ගමන ඇරැඹූ ඇයට පසුකාලීනව වේදිකාවේ වගේම ටෙලිනාට්ය ක්ෂේත්රයේත් සම්මාන හිමිකර ගැනීමට වාසනාව හිමිවිය. ඉතින් දිගු කාලයකට පසු නැවැත ඇය මේ දවස්වල ‘මද්දු’ ලෙසින් ‘පානාමංකඩ’ ටෙලිනාට්යයෙන් ඔබට සමීප වෙනවා. ඉතින් ඇයගේ රංග කුසලතාව ගැන අමුතුවෙන් කිවයුතු නැහැ. ඇය තමයි නදීෂා මදුෂාණි රූපසිංහ.
නදීෂා ඉතින් කොහොමද ජීවිතේ..? මේ දවස්වල පුංචි තිරයේ බෙර පදයට තාලය අල්ලන හැටි දකිනවා. අපි කැමැතියි ඒ කතාව ගැන දැනගන්න?
‘පානාමංකඩ’ ටෙලිනාට්යයේ ‘මද්දු’ ලෙසට තමයි මම රඟපාන්නේ. ඒ කියන්නේ අප්පච්චිට දූවරුන් පස්දෙනෙක් ඉන්නවා. මම තමයි තුන් වැනි දුව ලෙසට රඟපාන්නේ.
ඔබ කාලෙකට පස්සේ තමයි නැවැත ටෙලිනාට්යයක රඟපාන්නේ. කොහොමද ඔබට මේ අවස්ථාව ලැබෙන්නේ?
‘පානාමංකඩ’ ටෙලිනාට්යයේ පිටපත් රචක ඒ වගේම ජනප්රිය රංගන ශිල්පී සමන්ත කුමාරගමගේ අයියාව සහ රනිල් අයියාව මට මුලින්ම හමුවන්නේ ‘තුන්මංතැන්න’ ටෙලිනාට්යයේදී. ඉතින් ඒ තිබුණු දැනහැඳුනුම්කම මත තමයි සමන්ත අයියා මට ආරාධනා කළේ ‘පානාමංකඩ’ කියලා ටෙලිනාට්යයක් මම ලියනවා, ඒ නාට්යයේ ‘මද්දු’ චරිතයට මාව තෝරාගෙන තිබෙනවා කියලා.
ඉතින් ඔබ එකපයින් කැමැති වුණාද?
ඇත්තටම සමන්ත අයියා පැවැසූ විදියට චරිතයේ ස්වභාවයට මම ගොඩාක් කැමැති වුණා. ඒ වගේම අපේ දේශීය උඩරට නැටුම් කලාව මූලාශ්රය කරගෙන මේ ‘පානාමංකඩ’ ටෙලිනාට්ය නිර්මාණය කරන්නේ කියලා රනිල් කුලසිංහ අයියා කිව්වා. මම දන්න කියන ගොඩදෙනෙක් වගේම සුවිශේෂී ශිල්පීන් රැසක් රඟපාන නිසා පැකිලීමක් නැතුව මම කැමැතියි කිව්වා.
හැබැයි ඔබ හිතපු තරම් ‘මද්දු’ සංවේදී නැහැ නේද?
‘මද්දු’ කියන චරිතය ගැමි චරිතයක් වුණාට ටිකක් රැඩිකල්, දඩබ්බර, විශේකාර චරිතයක් තමයි මට නිරූපණය කරන්න තිබුණේ. ‘මද්දු’ සිහින එක්ක තමයි ජීවත් වෙන්නේ. අඩු තරමේ අප්පච්චි කියන දේවත් අහන්නේ නැහැ. ඉතින් මට දැනෙන්න යමක් කරන්න තිබුණු නිසා ආශාවෙන් කළා.
මේ චරිතය වෙනුවෙන් අභියෝග රැසකට මුහුණපෑමට සිදුවුණා නේද?
අම්මෝ ඔව්… ලොකු ගස්වලට නඟින්න සිද්ධ වුණා. ඒ විතරක් නෙවේ වැව්වල පීනන්න සිද්ධ වුණා.
වැවට බහින්න නම් ලොකු බයක් තිබුණා කියලා ආරංචියි?
එක්තරා දර්ශනයක් තිබුණා මගේ පෙම්වතා වැවේ පීනාගෙන ගොඩට එනවා මාව දැකලා මම සමග කතා කරන්න. ඒ අවස්ථාවේ වැවේ කිඹුලෙක් සිටින බව ඩ්රෝන කැමරාවෙන් අපිට දැකගන්න ලැබුණා. එදා නම් මම පුදුම බයක් වුණේ. ඔහුට කරදරයක් වෙයි කියලා. ඒ තිබුණු බයත් එක්ක මට නැවැත තිබුණා වැවකට බහින්න. කිඹුලාට තිබුණු බය නිසාම මම බහින්න අදිමදි කළා. ඒත් ඉතින් සියලුම දෙනාගේ සහාය ඇතිව මම වැවට පස්සේ බැස්සා.
ඔබ සම්මාන හිමිකර ගත්ත සුවිශේෂී රංගන ශිල්පිනියක්. එහෙත් නිර්මාණවල දකින්නේ අඩුවෙන්?
2017 නැඟී එන නිළියට ‘රයිගම්’ සම්මාන උළෙලේ සම්මාන මට හිමිවුණා. යෞවන කෙටි නාට්ය උළෙලේ හොඳම කෙටි නාට්ය නිළියට හිමි සම්මාන හිමිවුණා. මට එහෙම සම්මාන ලැබුණා කියලා හැම නිර්මාණයකටම සම්බන්ධ වීමට අදහසක් නැහැ. කාලෙකට පස්සේ තමයි මම ‘පානාමංකඩ’ ටෙලිනාට්යයට සම්බන්ධ වුණේ.
-වසන්ත විතාරණගේ
