කළු ජූලියේ හතලිස්වන සැමරුම වෙනුවෙන් කැනඩා අග්රාමාත්ය ජස්ටින් ටෲඩෝ විශේෂ ප්රකාශයක් නිකුත් කර තිබේ. එම ප්රකාශයේ දළ සිංහල පරිවර්තනය අපි පහත පළ කරමු.Sri Lanka Latest News
අදින් වසර හතලිහකට එපිට, 1983 ජූලි මාසයේ දී, ශ්රී ලංකාව පුරා, දෙමළ විරෝධී බිහිසුණු සංහාරයක් දියත් විය. ඔවුන් දහස් ගණනකගේ ජීවිත බිලිගත් අතර, තවත් බොහෝ පිරිසක් තුවාල වීම්, අවතැන් වීම් සහ ලිංගික හිංසනයන්ට ගොදුරු වූ හ. කළු ජූලියේ බිහිසුණු ම්ලේච්ඡත්වය තවත් දශක ගණනාවක් පුරා දිග්ගැහුණු සන්නද්ධ යුද්ධයකට මග පෑදූ අතර, යුද්ධය තවත් ජීවිත විශාල ප්රමාණයක් ගොදුරු කරගත්තේ ය. එමෙන්ම, එහි පීඩාවන්ට ගොදුරු වූ ජනප්රජාවන් අදටත් එම පීඩාව විදදරාගනිති.
ඒ අමිහිරි මතක යළි ස්මරණය කරන මේ දිනයේ දී, අපි, කලු ජූලියේ දී මියගිය දෙමළ වැසියන් සිහිපත් කිරීමටත්, දිවි ගලවාගත්තවුන්ට ගෞරවය දැක්වීමටත්, වෛරයට සහ ප්රචණ්ඩත්වයට එරෙහිව අපගේ පෙනී සිටීම යළි යළිත් තහවුරු කිරීමටත්, කැනේඩියානු දෙමළ ප්රජාව සහ ලොව පුරා විහිදී සිටින ද්රවිඩ ප්රජාවන් සමග, එක් වෙමු.
පසුගිය වසරේ දී, කැනේඩියානු පාර්ලිමේන්තුව, මැයි 18 වන දා දෙමළ ජනසංහාර දිනය ලෙස ඒකමතිකව සම්මත කර ගත්තෙමු. මේ වසරේ දී එහි පළමු සැමරුව සිදුකරන ලදී.
අද අපි, නැවත, මානව හිමිකම් උල්ලංඝණය කිරීම සහ අපයෝජනය සම්බන්ධයෙන් ශ්රී ලංකාවේ වගවීම ඉල්ලා සිටිමු. කැනඩාව, මානව අයිතිවාසිකම් වෙනුවෙන් පෙනී සිටීම කිසිදිනෙක අත නාරිනු ඇත. එමෙන්ම ශ්රී ලංකාව මුහුණ දී සිටින දැවැන්ත ආර්ථික අර්බුදය මධ්යයේ එහි පීඩාවට ගොදුරු වීමේ වැඩි අවදානමක් ඇති ජනප්රජාවන්ට උදව් කිරීමට තිබෙන කැපවීමද අත නාරිමු..!
විවිධත්වය, සෑම විටකම, කැනඩාව සතු ශක්තීන්ගෙන් ප්රධානතම ශක්තියයි.
83 කළු ජූලිය බොහෝ පිරිසකට ලංකාවෙන් පිටමංවීමට බල කල විට, කැනඩාව, 1983 දී විශේෂ වැඩපිළිවෙලක් දියත් කළේ ය. එහි ප්රතිඵලයක් ලෙස ද්රවිඩ ජනාතව 1800 ක් ඔවුන්ගේ ජීවිත යළි ආරම්භ කිරීම සදහා කැනඩාව තෝරා ගත්තේ ය. මේ වන විට කැනඩාව, ලෝකයේ විශාලතම ද්රවිඩ ඩයස්පෝරාවන්ගෙන් එකකි.
කළු ජූලියත්, ඉන් පසුව ඇති වූ ප්රචණ්ඩත්වයත් මධ්යයේ පීඩාවන්ට ගොදුරු වූ සහ ඔවුන්ගේ ආදරණීයයන් අහිමි වූ සියල්ලන් වෙත, කැනඩා රජය වෙනුවෙන් මම මගේ ගැඹුරු ශෝකය ප්රකාශ කරමි. ඔවුන් සියල්ලන් වෙනුවෙන් වෙනස්කොට සැලකීමෙන් තොර අනාගතයක් ගොඩ නැගීමට ඇති අපගේ කැපවීමද ප්රකාශ කර සිටිමු.
