දූෂණ විරෝධී පනතට අදාළව අගමැති දිනේෂ් ගුණවර්ධන මහතාගේ කාර්යාලයේ අගමැතිවරයා හා ආණ්ඩු පක්ෂ මන්ත්රීවරුන් පිරිසක් අතර පැවැති සාකච්ඡාවක තොරතුරු විපක්ෂ නායක සජිත් ප්රේමදාස මහතා අතට පත්වීම සම්බන්ධයෙන් මේ වන විට ආණ්ඩුව ඇතුළේ විශාල ආන්දෝලනයක් මතුව ඇති බවක් දැනගන්නට තිබේ.Sri Lanka Latest News
අගමැති දිනේෂ් ගුණවර්ධන මහතාගේ ප්රධානත්වයෙන් පසුගිය බ්රහස්පතින්දා (06) දිනයේදී පැවැති මෙම සාකච්ඡාවේදී ශ්රී ලංකා පොදුජන පෙරමුණේ මන්ත්රීවරුන් රැසක් අගමැතිවරයාට පෙන්වා දී තිබුණේ තමන්ට දූෂණ විරෝධී පනතට සංශෝධන රැසක් ඉදිරිපත් කිරීමට නියමිතව ඇති බැවින් එම කෙටුම්පත බ්රහස්පතින්දා දිනයේදී සම්මත නොකරන ලෙසටය.
ඒ අනුව, අගමැති දිනේෂ් ගුණවර්ධන මහතා මෙන්ම සාකච්ඡාවට සහභාගි වී සිටි සභානායක සුසිල් ප්රේමජයන්ත මහතා පොහොට්ටු මන්ත්රීවරුන්ගේ ඉල්ලීමට එකඟතාව පළකරමින් ඡන්ද විමසීම කල්දැමීමට කැමැත්ත ප්රකාශ කොට ඇත.
නමුත් ඊට සාකච්ඡාවට සහභාගි වී සිටි අධිකරණ අමාත්ය විජයදාස රාජපක්ෂ මහතා සිය විරෝධය පළකොට ඇති බවක් දැනගන්නට තිබේ. අමාත්යවරයා පෙන්වා දී ඇත්තේ මෙම පනත් කෙටුම්පත යොදාගෙන ඇති පරිදි එදිනම සම්මත කළ යුතු බවකි.
කෙසේ වෙතත් පොහොට්ටු මන්ත්රීවරුන්ගේ දැඩි විරෝධය හමුවේ අධිකරණ අමාත්යවරයා නිහඬ වී ඇති බවක් දැනගන්නට තිබේ.
ඒ අනුව, දූෂණ විරෝධී පනත් කෙටුම්පතට ඡන්ද විමසීම කල්දැමීමට ආණ්ඩු පක්ෂය තීන්දු කොට ඇත.
නමුත් සාකච්ඡාව අවසන් වීමත් සමග රැස්වීමේ සිටි පොහොට්ටුවේ මන්ත්රීවරයකු මේ බව විපක්ෂ නායක සජිත් ප්රේමදාස මහතාට දැනුම් දීමට පියවර ගෙන ඇත. එම මන්ත්රීවරයා, විපක්ෂ නායකවරයාට දැනුම් දී ඇත්තේ ආණ්ඩුව මෙවැනි තීන්දුවක් ගත් නමුත්, අධිකරණ ඇමැති විජයදාස රාජපක්ෂ මහතා ඊට විරෝධය පළකළ බවකි. නමුත් මන්ත්රීවරුන්ගේ විරෝධතාව හමුවේ අධිකරණ අමාත්යවරයාද නිහඬ වූ බව මෙම පොහොට්ටුවේ මන්ත්රීවරයා විපක්ෂ නායකවරයාට දැනුම්දීමක් කොට තිබේ.
ඒ අනුව විපක්ෂ නායකවරයා තීන්දු කොට තිබුණේ පාර්ලිමේන්තු සභාගැබේදී ආණ්ඩුවේ මෙම ක්රියාකලාපයට දැඩිව විරෝධය පළකොට, එදිනම ඡන්ද විමසීම පවත්වා දූෂණ විරෝධී පනත සම්මත කරගැනීමටය. ඒ සඳහා තමන්ට පොහොට්ටුවෙන් ලැබුණු පණිවුඩය උපක්රමශීලීව යොදාගත් විපක්ෂ නායකවරයා ඒ සම්බන්ධ විවාදය මතුවෙද්දී ඒ සම්බන්ධයෙන් වන අධිකරණ අමාත්යවරයාගේ ස්ථාවරය විමසා සිටීමට පියවර ගත්තේය. එහිදී අධිකරණ අමාත්ය විජයදාස රාජපක්ෂ මහතා සඳහන් කළේ ඊට තමන්ගේ විරෝධයක් නැතැයි කියාය.
අධිකරණ අමාත්යවරයාගේ මෙම පිළිතුරත් සමග ආණ්ඩුවට දූෂණ විරෝධී පනත් කෙටුම්පත එදිනම සම්මත කරගැනීමට සිදුවිය. ඒ, පොහොට්ටු මන්ත්රීවරුන් විසින් ඉදිරිපත් කරන සංශෝධන ලබන 19 වැනිදා එම කෙටුම්පතට එක්කිරීමේ එකඟතාව මතය.
