මැතිවරණ කොමිසම පළාත් පාලන ඡන්ද විමසීම් පැවැත්වීමේ මූලික වියදම් පියවා ගැනීම සඳහා රාජ්ය අරමුදල්වල පළමු වාරිකය ලෙස රුපියල් මිලියන 800ක් අවශ්ය බවට මහාභාණ්ඩාගාරය වෙත දැනුම් දීමක් කර ඇති අතර එම මුදල් නිදහස් කරන බවට භාණ්ඩාගාර සහතිකය ලැබී ඇති බව වාර්තා වේ.
මේ පිළිබද විමසීමේදී මැතිවරණ කොමිසමේ කොමසාරිස් ජනරාල් සමන් ශ්රී රත්නායක මහතා පවසා ඇත්තේ “අපට මැතිවරණ වියදම් සඳහා පළමු වාරිකය ලෙස රුපියල් මිලියන 800ක් විතර අවශ්යයි. මැතිවරණයට මුදල් ලබාදීම හෝ භාණ්ඩාගාරයෙන් මුදල් නිදහස් කිරීම සම්බන්ධයෙන් කිසිදු ගැටලුවක් මතුවනු ඇතැයි අපේක්ෂා කරන්නේ නෑ.’ යැයි කියාය.
“සෑම විටම මුදල් බෙදා හැර ඇත්තේ අදියර වශයෙන්. මෙය සැමවිටම සිදුවී ඇති අතර මැතිවරණ කොමිසමට පමණක් නොව අනෙකුත් ආයතන සඳහාත් ඒක එහෙමයි. අයවැයෙන් කොමිෂන් සභාවට මුදලක් වෙන් කර ඇති අතර ඒ අනුව භාණ්ඩාගාරය අපට මුදල් ලබා දෙනු ඇති. මැතිවරණ දිනයට අදාළ ගැසට් නිවේදනය පෙබරවාරි 21 වැනිදා වන විට ප්රකාශයට පත් කරනවා’ යැයි රත්නායක මහතා පැවසීය.
මේ අතර, භාණ්ඩාගාර නියෝජ්ය ලේකම් ආර්.එම්.පී. රත්නායක කියා සිටියේ මුදල් සොයගෙැනීම පිළිබද ප්රශ්නයක් ඇත්නම් මැතිවරණයට අරමුදල් සැපයීමට රජය විසින් භාණ්ඩාගාර බැඳුම්කර විකිණීමට කටයුතු කරන බවයි.
“අපි මුදල් නිදහස් කළ යුතුයි. අපිට මුදල් ප්රවාහ ප්රශ්නයකට මුහුණ දෙන්න වුණොත් අපි වෙළෙඳපොළට ගිහින් ඉහළ පොලී අනුපාතවලට ණය ගන්නවා.” යැයි ඒ මහතා කීය.
මහා භාණ්ඩාගාරය විසින් මැතිවරණය සඳහා වෙන් කර ඇති සියලුම මුදල් එකවර මුදා නොහරින බවත්, එය සාමාන්ය ක්රියා පටිපාටිය මෙන් අදියර වශයෙන් සිදු කරන බවත් ඔහු පැවසීය.
